Ka 8 tarik September ka dei ka sngikyrpang jong ka thoh ka pule puthi bala tip kum ka World Literacy Day ha kaba ka thong jong ka UNESCO ban buh ia kane ka sngi ka long ban iawer lang ia ki paidbah nongshnong shnong ba don ha ki ri ka pyrthei ba kin shim ka jingkitkhlieh lang ha ka ban kyntiew ia ka pule puthi bad rat dyngkhong ia ka jingsahdum sahbiej ha man ki shnong ki thaw.
Kumta ruh ki skul ha West Jaintia Hills District da ka jingsngewkhia ia kane ka sngi ki la shim ban pynlong ki prokram bapher ia ki khynnah skul kiba long shibynta ban pynkynmaw ia ka jinglong kyrpang jong kane ka sngi kumba la dep pruid dak da ka UNESCO naduh u snem 1966.
Ki jait prokram ba la pynlong ha kane ka sngi na ka bynta ki khynnah haman ki skul ki long ka Drawing-Painting, Poetry writing, Slogan writing bad ka Recitation kiba iadei bad ka World Literacy.
Ka kong Tina Lakiang, Secretary SMC R.C. Eve Secondary School Mihmyntdu haba kren ha ka jingialang ba la pynlong ha kane ka skul, ka la iathuh ha ibor barit kane ka skul kum kawei na ki shlem ai jinghikai ba peit kyrpang ia kito ki khynnah ba wan na ki long iing longsem ba ban ka jingduk jingkyrduh bad kito ki bym ju leit skul ne pep skul shiteng por ki la ialeh katba lah la i bor ban khring ia ki khynnah ba kin wan ha kane ka Skul na ka bynta ba kin ioh ia ka jingnang jingstad bad ruh kin lait na ka jingim lyngkar.
Shuh shuh ka da sngew sarong ruh ban iathuh ba kumba long haduh mynta ki don shibun ki khynnah kiba wan ban pule ha kane ka skul bad ka jingdon ki khynnah ne ki briew ba nang ban thoh bad pule hapoh ka shnong Mihmyntdu ki la bun bad kane ka pyniruh ba ka literacy rate jong ki nongshnong shnong ka la nangkiew haba ianujor bad ki por ba la leit.
Na ka liang ki nonghikai ha ka thong jong kane ka sngi haman ki skul ki la shim bynta ruh ban ai ki jingkren jingbatai shaphang ka jingkordor jong ka jingnang jingstad bad ruh ki kyntien ai mynsiem ia ki khynnah da kaba pynshong nongrim halor ka mat pdeng jong kane ka sngi ba ong “Transforming Literacy-Learning Spaces”.
