Ka jingialang jong ka KSU EJHDU kaba la long ha ka 14/09/2023 ha VIKA Guest House Conference room ka la shim ia ka sien jam kaba ar ban pynlong ka jingiakhih paidbah da kaba thiah hapdeng surok bah NH-6 ha Khliehriat kaba dei ka HQ jong ka District East Jaiñtia Hills. Ia kane ka jingiakhih yn pynlong ha ka 25/09/2023 (Monday) naduh ka por 10:00am haduh 04:00pm.
La shim ia kane ka rai hadien ba ka NHAI kam shym la patiaw ne sngap ia ka jingdawa ka seng ha ka wat ba nyngkong jong ka jingiakhih ha khmat Tollgate ha Lumshnong mynha ka 08/08/2023. Ka jingiakhih ha kato ka sngi kaba la wan ia shim bynta naduh ki rangbah shnong jong ka thaiñ Elaka Narpuh lem bad ki paidbah ba bun. U Manager Technical jong ka NHAI u Biswa Jyoti Lahkar u la kular ban pyndep ia ka jingmarmot ia u surok hapoh ka 6 taïew kaba mut un sdang naduh ka 09/08/2023, hynrei kata ka 6 taïew ka la jan kut, hynrei ym don dak eiei.
Dang ha kine ki khyndait sngi ka seng ka la hiar shaduh Ratachera ban jurip, la lap pynban ba u surok u nangjot nangjot rathai katba nangmih ki sngi. Kane ka long ka jingkular kai kular thok jong ka NHAI. Dei halor ka jingleh bymsuid ñiew ka NHAI kumjuh ka sorkar ka la pynlong ruh tang ka jaka iaid na surok ym don jaka shuh ia ki paidbah. Ym don ba nud shuh ban mih iaid kai sha surok. Por don slap da ka ktieh por rang rkhiang da u pum pum. Sangsot shisha ia u paidbah, kat sha ba leit ka jingsahkut kali, ki paidbah shisha ki la mad kthang.
Kumta ka seng ka khot ka wer ia ki paidbah nongshong shnong ka East Jaiñtia Hills District baroh kawei bad ia kiwei kiwei ki paralok sengbhalang, ban wan ban ia snoh kti lang ha katei ka jingiakhih ba jai jai da kaba ngin thiah hapdeng surok bah. Ka long shisha ka jinglehraiñ kaba khraw ia ka sorkar jylla ha khmat ki 4 tylli ki jylla ka thaiñ shatei lam mihngi kum ka Mizoram, Tripura, Manipur bad Assam, namar une u surok bah u dei uba pyniasoh bad kitei ki jylla.
Shuh shuh hadien ba la iohi ba ka NHAI bad sorkar jylla kim leh eiei halor ka jingsniew tasam u surok, ka seng kam banse ban shim sa kawei ka sienjam kata hadien ba la kut ka jingthiah surok ha katei ka sngi, ha katei ka juh ka tarik ngi khot ngi wer lang ia baroh ki paradoh para snam ki nongshong shnong ka District bad kito ki jylla ba marjan, ka seng ka kyntu ba ngin sangeh ka leit ka wan, ka kamai kajih, ki kali bad rit bad khraw naduh ka janmiet jong katei ka sngi bad tarik naduh ka por 07:00pm haduh 05:00am.
Kane kan bteng haduh 1 taïew lynter tang por mynmiet. Kumta ngi kyrpad da ka mynsiem jingsngewkhia bad jingsngewrit sngewbha ai ka jingiasnoh kti lang jong phi baroh da kaba sangeh ban kamai ha katei ki kynta. Ki Ambulance bad kiwei kiwei ki kali ba long emergency te kin iaid kumba juh long, ym don ba lah ban khang. Ngi kyntu ruh ia ki paidbah ban ym pynmih kino kino ki jingklumar ha ki kynta jong ka jingthiah surok ne ha ki kynta jong ka jingsangeh iaid kali por mynmiet. Kiba leh tam kin shim hi ka jingkitkhlieh, ki bor jong ka aiñ kin pynshitom. “Tylli ngin ïeng, saphred ngin kyllon”. Ka jingiatylli ka long ka bor, pynkut ka kyrwoh khubor na u Samla Hamewanpynhun Ryngkhlem Publicity Secretary KSU East Jaintia Hills District Unit