Ka kynhun ïalehkai jong ka Amlarem Social Club kala long syndon ka lahduh haka kyrdan ‘Super Division’ jong ka lympung ïalehkai phutbol ka Amlarem Football League 2024-2025 bala pynïaid da ka Amlarem Sub-Divisional Sports Association (ASSA), mynta ka sngi 6 tarik ha Madan phutbol ka Jaraiñ, West Jaiñtia Hills District.
Haba phai sha ka jingïakhun phainal mynta ka sngi ka Amlarem Social Club kala lah ban pynliem da shikol la not (1-0) ïaka Seinbhalang Shkentalang. Ïa katei ka shikol la thep da u Wankibha Pohthmi ba phong ïa ka Jersey No-19 haka minit kaba 22.
Ka jingïakhun hapdeng kine ki ar kynhun kala long kaba ïakhaid bha naduh ka kylla step tad haduh jong ka kylla miet, na ka liang ka kynhun Seinbhalang Shkentalang kala pyrshang katba lah ban pynphai kylla ïa katei ka shikol hynrei kam lah satia wat haduh ba kut jong ka jingïakhun. Lyngba katei ka shikol na ka Amlarem SC kala long syndon ka lahduh jong kane ka lympung ‘Super Division’.
Ïa ka nam Top Scorer la ïoh da u Tip Rasmut na ka Amlarem SC, Best Goalkeeper la ïoh da u Nangbun Surong na ka Amlarem SC bad ïa ka nam Man of the Match la ïoh da u Wankibha Pohthmi na ka Amlarem SC.
Na ka bynta ki khusnam sha ki nongjop la sam da u kongsan ma B. Richard Uriah uba dei u Principal ka North Liberty HSS, Jowai, ha ka jingdonlang ki dkhoh ka Amlarem Sub-Divisional Sports Association nalor kiwei de kiba la shah khot sngewbha lem bad ki paidbah kiba wan ban shakhi ïa kane ka jingïakhun phainal.
Ka kynhun kaba ïoh rah ïa ka nam lahduh (Champion) kala ïoh ïa ka song pisa (cheque) kaba 1 lak tyngka lem bad ka trophy, katba ka kynhun ba wan ba ar Runner-Up kala ïoh ïa ka song pisa kaba 50 hajar tyngka lem bad ka trophy.
