Ka klob Shillong Lajong FC kadei kawei na ki klob ha ka lympung Shillong Premier League (SPL) kaba thaw ia ki khana pateng bad kaba buh ia ki rekod thymmai, kata ha ka jingioh thep kol, ha ka jingkhur ia ka trophy, bad ha ka jinglah ban khring ia ki snar ïalehkai na kylleng ki District.
Ha kane ka samoi ruh, kane ka kynhun ka la buh ia ka rekod ba thymmai ha kaba ki la ioh thep haduh 10 kol pyrshah ia ka Ryntih FC khlem da shah pynphai wat tang shi kol ruh (clean sheet).
Kawei na ka jingioh kabu ka Lajong ban thep kput ha kane ka sngi kadei namar ba ka Ryntih kadei ruh ka kynhun ba tlod tam ha kane ka samoi bad ka don ha trai duh ha ka jingkamai poiñ, kata tang 6 poiñ na ki 14 sien ki jingialehkai.
Ha katei ka jingiakhun, u Deibormame Tongper uba dei ruh uwei na ki snar thep kol ka Lajong, u la ioh haduh 7 kol bad pynlong ruh ia u ban bat ia ka kyrdan ba nyngkong ha ka jingiohthep bun kol tam mynta ka aiom. Ia kitei ki 7 kol u la thep ha ka minit ba 8, 22, 24, 29, 46, 53, bad 57. Katba ia ki 3 kol la ioh ban thep da u Riborlang Lyngkhoi (36,61) bad Yohaan Benjamin (51).
Hadien katei ka jingiakhun, ka Lajong ka la ioh ban kamai 32 poiñ na 13 sien ki jingialehkai bad ka Mawlai kaba dang bat ia ka kyrdan ba nyngkong ka la ioh haduh 35 poiñ na 13 sien ki jingialehkai.