Ka Ribhoi District CA kala jop da 171 runs ïa ka Eastern West Khasi Hills District CA, haka jingïalehkai jong ka Under-16 Boys Inter District Cricket Tournament 2025 (Zone-1) kaba la long mynta ka sngi 21 tarik u Ïaïong.
Ïa kane ka lympung la pynlong da ka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission, West Jaiñtia Hills District.
Haba phai sha ka jingïalehkai mynta ka sngi hapdeng ka Ribhoi District CA pyrshah ïa ka ka Eastern West Khasi Hills District CA. Ïa ka jingkynting toss la jop da ka Ribhoi District CA kaba la kam trai ban tied shuwa. Ka Ribhoi District CA haba wan ban tied nyngkong kala kamai 226 runs na ki 50 overs bad liem 9 wickets. U Anmol Shah ula lehkai bha da kaba tied marwei 61 runs na ki 71 balls bad u la ïoh 10 tylli ki Fours (4s). U ManbhalangL Marshillong (C) pat u la tied 48 runs na ki 84 balls ryngkat bad 7 tylli ki Fours (4s). U Dabetbhalang Kharjana u nongkawang ball jong ka Eastern West Khasi Hills District CA u la khyrwit marwei 3 wickets na ki 12 overs.
Ka Eastern West Khasi Hills District CA ha ka pali jong ka ban beh ïa ka thong, ki nongtied jong ka kim lah ban shan ïaka jingtbit jong ki nongkawang ball jong ka Ribhoi District CA bad ki la kyllon uwei hadien uwei bad ki lah ban tied tang 55 runs na ki 21 overs bad duh noh baroh 10 wicket.
U Anmol Shah uba ioh bun run na ka Ribhoi District CA ula ialehkai bha ruh ha ka bowling da kaba ïoh ban pynhap 5 wickets na ki 2 overs bad kane kala pynlong ïa u ban ïoh ïa ka nam Man of the Match.
Ka jingïalehkai lashai ka sngi 22-04-2025 kan long hapdeng ka South West Khasi Hills District CA pyrshah ïa ka West Khasi Hills District CA naduh ka por 8 baje shiteng mynstep.
