Ka South West Khasi Hills District CA kala jop da 56 runs ïa ka West Khasi Hills District CA haka jingïalehkai jong ka Under-16 Boys Inter District Cricket Tournament 2025 (Zone-1) kaba la long mynta ka sngi 22 tarik Ïaïong.
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Haba phai sha ka jingïalehkai mynta ka sngi hapdeng ka West Khasi Hills District CA pyrshah ïa ka South West Khasi Hills District CA. Ïa ka jingkynting toss la jop da ka West Khasi Hills District CA kaba la kam trai ban kawang bol shuwa.
Ka South West Khasi Hills District CA haba leit tied nyngkong kala kamai 138 runs bad liem lut baroh 10 wicket haka 37.5 over. U Phrangborlang Syiemlieh ula lehkai bha lyngba ka bat da ka ba tied marwei 53 runs na ki 85 balls bad u la thlieh ruh 7 tylli ki Fours (4s). U Phibanaibor Iawphniaw (C) pat ula tied 17 runs na ki 39 balls ryngkat bad 2 tylli ki Fours (4s). U Elvinson Nongsiej, nongkawang ball jong ka West Khasi Hills District CA ula khyrwit marwei 4 wickets na ki 9.5 overs bad u Pynskhemlang Nongsiej u la ïoh ban pynhap 3 wickest na ki 9 overs.
Namar ka jingpynthut na u slap, lahap ban pynduna ïaki overs ban beh ïa ka thong na ka 50 overs sha ka 45 overs bad ka thong ba thymmai ka long 133 runs da kaba pyndonkam daka DLS Method.
Ka West Khasi Hills District CA ha ba beh ïa kane ka thong, ki nongtied jong ka kim lah ban shan ïaka jingtbit jong ki nongkawang ball jong ka South West Khasi Hills District CA bad ki la kyllon uwei hadien uwei, lait noh na U Leadest Son marwei u ba la tied 42 runs na ki 58 balls bad baroh lang ki lah ban tied tang 76 runs bad duh noh baroh 10 wickets ha ka 29.5 overs. U Steviericson Iawphniaw jong ka South West Khasi Hills District CA uba la lehkai bha ha ka bowling da kaba ïoh ban pynhap 6 wickest na ki 4.5 overs u la ïoh ïa ka nam Man of the Match.
Ka jingïalehkai lashai ka sngi 23-04-2025 kan long hapdeng ka SCA ‘A’ pyrshah ïaka SCA ‘B’ naduh ka por 8 baje shiteng mynstep.