Ka kynhun ïalehkai jong ka Mupliang SC kala jop da 8 wickets ïa ka West Jaiñtia Police CC haka jingïalehkai jong ka District Cricket League 2025 bala pynïaid daka West Jaiñtia Hills District Cricket Association (WJHDCA) mynta ka sngi 25 tarik ha Mini Stadium, Khliehtyrshi.
Ka jingïalehkai mynta ka sngi ka la long ka ba noh shilliang hapdeng ka Mupliang SC pyrshah ïa ka West Jaiñtia Police CC, ha kaba ka Mupliang SC ka la jop da 8 wickets.
Ïa ka jingkynting toss la jop da ka Mupliang SC kaba la kam trai ban kawang ball nyngkong. Ka West Jaiñtia Police CC haba leit tied nyngkong kala kamai tang 104 run bad liem lut baroh 10 wickets ha ka over kaba 25.2. U Devention Lyngdoh u la long tang ma u marwei u ba kham neh slem ha ka jingtied napdeng ki nongtied jong ka West Jaiñtia Police CC da kaba tied marwei 30 runs na ki 56 balls ryngkat bad 4 tylli ki Fours (4s). U Defender Dhar (C), nongkawang ball jong ka ka Mupliang SC u la khyrwit marwei 4 wickets na ki 6.2 over.
Ka Mupliang SC ha ka pali jong ka ban beh ïa ka thong, ka la lah ban pynjop da ka ba ïoh 109 runs tang ha ki 17.3 ober bad hap tang 2 wickets. Baroh saw ngut ki nongtied jong ka Mupliang SC kiba mih madan mynta ka sngi ki la noh synñiang shi katdei ha kaba tied ban beh ïa ka thong. U Mewan Phawa u la tied 28 (41), u Byforcestar Dhar u la tied 26 (13), u Sandy Kharshandi u la tied 21 run (khlem out na ki 16 balls) bad u Oniwaker Sna pat u la tied 19 run (khlem out na ki 35 balls). U Devention Lyngdoh bad u Monjur, ki nongkawang ball jong ka West Jaiñtia Police CC ki la ïoh ban pynhap mar 1 wicket.
U Defender Dhar, Captain jong ka Mupliang SC u ba ïalehkai bha mynta ka sngi ha ka jingkawang ball, u la ïoh khur ïa ka nam Man of the Match.
Ka jingïalehkai lashai ka sngi Saitjain 26/04/2025 kan long hapdeng ka Young Lad’s CC pyrshah ïaka Evergreen Mukhla Mission naduh ka por 9 baje mynstep.
