Ka ïew ïadie ïathied rangialehkai na ka bynta ka aiom ialehkai jong u snem 2025-26 ka la poi mynta sha ka sngi ba 8 ha kaba la sakhi ruh hynne ka sngi ka 28 Iaiong 2025 ba ki samla ieit phutbol ki la wan tuid sha ka Ophis treikam jong ka Shillong Sports Association (SSA) na ka bynta ban soi thymmai bad pynthymmai klob shwa ban sdang ka aiom ialehkai ba thymmai na ka bynta ki lympung bapher bapher kynthup ha ka Shillong Premier League, Meghalaya State League, 1st Division, 2nd Division, 3rd Division bad 4th Division jong ka SSA.
Haduh kane ka tarik, ki rangialehkai kiba la soi thymmai ka la kot haduh 103 ngut. Ka khubor kaba kham phylla bad sngewlyngngoh ka long ba u snar ialehkai na ka Klob Shillong Lajong FC, u Hardy Cliff uba la ialehkai ruh ha ka lympung Durand Cup 2024 kaba dei ruh ka lympung kaba heh ha India bad kaba la rim tam ha Asia u la kut jingmut ban sdang ia ka jingiaid lynti ba thymmai, kata da kaba jied ban ialehkai ha ka lympung kaba kham rit da kaba iasoh bad ka klob Nongkseh SC kaba dang don mynta ha ka thup 1st Division jong ka SSA.
Tiak ban shu pynkynmaw, u Cliff u la sdang ia ka jingiaid lynti ha ka kam ialehkai phutbol na ka klob Shillong Lajong ha u snem 2016-2019, hadien katei u la iasoh bad ka klob na Kolkata ka Southen Samity na ka bynta shi aiom (2019-20). Tang hadien shi snem u la bteng ban ialehkai ha ka lympung Shillong Premier League da kaba iasoh bad ka klob Ryntih FC na ka bynta 2 snem (2020-2022). Tang katto katne por u Cliff u la leit ban iasoh pat bad ka Klob Bengaluru United na ka bynta shi aiom (2022-2023). Hadien 4 snem ba u la jah na ka klob Lajong, ha ka aiom ba bud u la jied ban wanphai biang bad katei ka klob bad pynkut noh mynta u snem 2025.
Kane ka aiom soi rangialehkai kan kut noh mynta u bnai, kata ha ka 30 Iaiong 2025.