Ka kynhun ïalehkai jong ka Moodymmai SC bad ka Khliehtyrshi SC kila ïasam mar shi point na ka daw ka jingpynthut u slap, ha ka jingïalehkai jong ka District Cricket League 2025 bala pynïaid da ka West Jaiñtia Hills District Cricket Association (WJHDCA) mynta ka sngi 30 tarik ha Mini Stadium, Khliehtyrshi.
Haba phai sha ka jingïakhun ïa ka jingkynting toss la jop da ka Moodymmai SC kaba la kam trai ban tied nyngkong. Ka Moodymmai SC haba leit tied nyngkong kala kamai 167 runs bad liem lut baroh 10 wickets ha ka overs kaba 29.5. U Pyndap Lamin, u Lammi Passah bad u Stewinson Ryngkhlem ki la lehkai bha mynta ka sngi ha ka jingtied napdeng ki nongtied jong ka Moodymmai SC. U Pyndap Lamin u la tied marwei 44 runs (khlem out) na ki 45 balls ryngkat bad 8 tylli ki Fours (4s). U Lammi Passah ula tied 37 runs na ki 42 balls ryngkat bad 4 tylli ki Fours, u Stewinson Ryngkhlem pat u la tied 30 runs na ki 29 ball ryngkat ba iwei I Six (6) bad lai tylli ki Fours (4s). U H. Timi Ryngkhlem bad u Wan O Rymbai, ki nongkawang ball jong ka ka Khliehtyrshi SC ki la ïah ban khyrwit mar 3 wickets.
Shwa ban poi ka pali jong ka Khliehtyrshi SC ban beh ïa ka thong, u slap u bajur u la hiar bad neh slem bha bad pynlong ïa ka madan baroh kawei ban dap um smam. Hadien ba ap katto katne por ki Umpire kila leit ban peit bniah ïa ka Madan bad ki la ïohi ba ym long shuh ban bteng ïalehkai kumta ïaka jingïalehkai la hap ban pyndam noh bad ki Captains jong baroh ar ki teams ki la mynjur ban ïabhah (share) Points.
Ka jingïalehkai lashai ka sngi Thursday 01/05/2025 kan long hapdeng ka West Jaiñtia Police CC pyrshah ïa ka Northeast A. U. (ATS) naduh ka por 9 baje mynstep.