Ka lympung ïalehkai phutbol bala pynïaid da ka Football Committee jong ka Sports and Youth Sub Committee ka WJSU, ïa kaba la tip kum ka ‘First War Jaiñtia Invitation Football Tournament 2025’, kaba la long mynta ka sngi saitjaiñ haka jingïakhun Quarter Final hapdeng ka Syndai pyllun SC pyrshah ïa ka Nongmadan CC Pynursla bad ïa kane ka jingïalehkai la pynlong ha madan Amshipai, Amsohkrut Amlarem.
Haba phai sha ka jingïakhun kala long kaba itynnad bha hapdeng kine kiar kynhun, na ka liang ka Syndai United SC ka jop lyngba da shi kol (1-0) ïa kaba la thep da u Refill Syndai haka minute kaba 78, da kane ka jingjop ka Syndai PyllunSC kala ïoh ban rung sha ka Semi Final jong kane ka lympung jingïalehkai phutbol.
Na ka liang ka Football Committee jong ka Sports and Youth Sub Committee ka seng kala pynbna paidbah ba ka jingïakhun kaba bud kan long kajingïakhun 1st Semi Final haka 7 tarik u Jymmang, 2025 kaba dei ka sngi Balang hapdeng ka Amlarem Social Club, Amlarem, Warjaiñtia region pyrshah ïaka Lamyrsiang SC, Saipung Block Sports Association haka por 2 baje nohphai sngi ha kane hi kajuh ka madan. Ka seng ka kyntu ïa ki paidbah ka War Jaiñtia ba kin wan ai jingkyrshanpura ïa kane ka lympung khnang ki jingthmu ba bha ka seng kin long kiba jop bad seisoh.
