Ha ka jingpyrshang ban kyntiew ïa ki kam ïalehkai bad ki kam jngohkai pyrthei hapoh ka District, mynta ka sngi la plie paidbah ïa ka madan ïalehkai phutbol (Futsal Football Ground) jong ka San Shnong Secondary School kaba don ha Mukhaialong kaba hap hapoh ka Wapung C&RD Block kaba la bei tyngka na ka District Mineral Foundation (DMF) Fund da u Myntri ka tnad Tourism, u Paul Lyngdoh ha ka jingïadonlang u Myntri Sorkar bad MLA ka thaiñ u ma Kyrmen Shylla, u MLA ka Ranikor bah Pius Marwein, u Deputy CEM ka Jaintia Hills Autonomous District Council (JHADC), ma Lasky Rymbai, u BDO ka Block Wapung C&RD Block, u Dr T. Shylla, ki khlieh nongialam shnong ka thain San Shnong, ki nonghikai, ki samla pule bad ki paidbah ka thain.
Ha ka jingkren jong u ha kane ka prokram, u Paul Lyngdoh u la pynpaw ïa ka jingshimkhia jong ka sorkar ban wanrah ïa ki projek pynroi bapher bapher ha ka jylla ha kylleng ki bynta bapher bapher kynthup ïa ki kam ïalehkai, ki kam jngohkai pyrthei, bad kiwei kiwei, kaba la ai mynsiem ruh ia ka jylla ban pdiang ia ka National Games ka ban sa long ha u snem 2027. U ban Paul ula shim ia ka kabu ban pynshlur ia ki samla jong ka distrik ban iashim bynta da ka jingsngewtynnad ha ki kam ialehkai bad u la iaroh ia u Myntri Rangbah ka Jylla na ka bynta ka jingthmu ban kyntiew ia ka Meghalaya kum ka nongbah jong ka jingialehkai phutbol jong ka ri India nalor ka jingai burom ia ka kum ka nongbah jong ka rwai ka tem jong ka Ri.
U la pyntip ruh ha kane ka jingïalang halor ki jingthmu bapher bapher ba la shim da ka sorkar ban kyntiew ïa ki kam ïalehkai ha ka jylla kynthup ïa ka jingthaw ïa ki lad jingïalehkai bad ka jingkyrshan pisa ba la pynïar sha ki klob ïalehkai phutbol. Ha kane ka sngi, u bah Lyngdoh u la pynbna ruh ba la mynjur ia ka pisa na ka bynta ban pynroi ia ki jaka jngohkai pyrthei ha East Jaintia Hills District kiba kynthup ia ka jingpynbha ia ka Umbyrlein Falls ha ka dor T.5.79 klur, ka jingpynbha ia ka Rynji Falls ha ka dor Rs. 9.64 klur, ka jingpynitynnad ia ka wah Moopun ha ka dor Rs. 6.44 klur bad ka jingpynitynnad ia ka kshaid Sahksaw ha ka dor Rs. 8.38 klur tyngka.
Katba na ka liang u ma Kyrmen Shylla, ha ka jingkren jong u, u la ïaroh ïa ki sienjam jong ka San Shnong Welfare Association ha kaba kyntiew ïa ka kam jngohkai pyrthei ha ka thaiñ, haba u la ban jur ïa ka jingdonkam jong ka jingïatreilang ha kaba wanrah ïa ki jingthmu pynroi bapher bapher ha ka thaiñ. U la pynpaw ruh ha ka jingïalang ïa ki jingthmu bapher bapher ba la shim lyngba ka District Mineral Foundation (DMF) Trust ha ki katto katne ki bynta jong ka roi ka par kynthup ïa ka jingthaw ïa ki jaka ïalehkai kum ki madan Futsal bad kiwei kiwei.
Kiwei de kiba la ai jingkren ha kane ka prokram ki long u bah Pius Marwein, u Deputy CEM ka JHADC, u Lasky Rymbai bad u Block Development Officer ka Wapung C&RD Block, East Jaiñtia Hills District, u Dr T. Shylla.
La pynphuh bad pynitynnad ia kane ka prokram da ki prokram shad bad rwai tynrai ba la pyni da ki samla pule bad ki dkhot SHG jong ka thain Mookhaialong.
