Ka kynhun ïalehkai Cricket jong ka SCA ‘B’ kala long ka lahduh hadien ba ka la lah ban pynliem ïaka TDCA da 8 wicket, ha ka jingïakhun phainal ka jingïalehkai Under-16 Boys Inter District Cricket Tournament 2025 (Zone-1) kaba la long mynta ka sngi 7 tarik u Jymmang, 2025.
Ïa kane ka lympung la pynlong da ka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission, West Jaiñtia Hills District.
Haba phai sha ka jingïalehkai phainal ïa ka jingkynting toss la jop da ka TDCA kaba la kam trai ban tied shuwa. Ka TDCA haba leit tied nyngkong, ki nongtied jong ka kim lah ban ïalehkai bha na ka daw ka jingtbit palat ki nongkawang ball jong ka SCA ‘B’ bad ki lah ban kamai tang 106 runs bad liem lut baroh 10 wicket haka overs kaba 41.4. Napdeng ki nongtied jong ka u Aniket Poddar ula lehkai bha da kaba tied marwei 31 runs (khlem out) na ki 44 balls ryngkat 5 tylli ki Fours (4s). U Doangkam Ch Marak pat u la kamai 25 runs na ki 23 ball ryngkat kawei ka Six (6) bad 3 tylli ki Fours (4s). U Arav Baraily (C), nongkawang ball jong ka SCA ‘B’ ula ïoh ban pynhap 3 wickets na ki 9.4 overs.
Ka SCA ‘B’ ha ka pali jong ka ban beh ïa ka thong, ki saw ngut ki nongtied jong ka kiba mih madan mynta ka sngi ki la lah ban pynjop suk da kaba kamai 109 runs na ki 22.2 overs. U Suraj Chettri ha kane ka sngi ruh ula pyni ïa ka sap ïalehkai jong u ha ka jingtied da kaba tied marwei 71 runs (khlem out) na ki 79 balls ryngkat kawei ka Six (6) bad 10 tylli ki Fours (4s). U Aniket Poddar nongïalehkai jong ka TDCA uba ïalehkai bha ha kaba tied ula ïoh ruh ban khyrwit 2 wickets na ki 8 overs.
Ïaka Nam Player of the Match mynta ka sngi la ïoh ban rah da u Suraj Chettri uba kamai bun run tam ha kane ka jingïalehkai. La sam ruh ïa ka Nam Best Batsman jong kane ka Tournament ha kaba u Suraj Chettri (368 runs) jong ka SCA ‘B’ ula ïoh ïa kane ka Nam da ka ba ïoh bun runs eh na baroh ki Nongtied ha kane ka Tournament.
Ïa ka Nam Best Bowler la ïoh rah da u Aniket Poddar (24 wickets), nongkawang bol jong ka TDCA u ba ïoh ban pynhap bun wicket ha kane ka Tournament. La sam ruh ïa ka Nam Player of the Tournament ha kaba u Aniket Poddar jong ka TDCA u la ïoh ia kane ka Nam.
La wan ban pynhap pyrda ïa kane ka lympung da u MLA ka Jowai u ma Wailadmiki Shylla, kum u Kongsan, katba u Assistant Director of Sports, u ma Khroobok Passah kum u Symbood Kongsan. La ïadon ryngkat ruh u Hony. Secretary jong ka MCA, U R. Kharkamni, u President jong ka West Jaiñtia Hills District Cricket Association, u Eddystone Shylla, u Secretary ka Mukhla Pyllun, Waheh Chnong Mukhla Mission, Mukhla Umlangshor, Mukhla Nongrim, Mukhla Shohshrieh, ki Dkhot jong ka MCA bad ruh ki Dkhot jong ka WJHDCA.
