Ka Ri Bhoi District ha Meghalaya ka la ioh ia ka madan ialehkai artificial football Turf kaba ar hapoh kine ki ar snem ha ka 13/05/2025. Kane ka jaka ialehkai ba thymmai ka thmu ban kyntiew ia ki jingialehkai bad pynshlur ia ki samla ban iashim bynta ha ka phutbol.
U myntri ka tnad ialehkai ka jylla Meghalaya u Shakliar Warjri u la buh ia u mawnongrim na ka bynta ka madan ialehkai synthetic football ha Nongsder, kaba long ka sien kaba ar kum kane ka jaka ialehkai ha Ri Bhoi hapoh ar snem.
Kane ka projek kaba T.10 klur, kaba kynthup ïa ka jingker kynroh kaba biang bad ki jingtei, ka dei ka bynta jong ka jingmang pisa jong ka sorkar Meghalaya kaba T.1000 klur na ka bynta ban kyntiew ïa ki kam ïalehkai hapoh ka Jylla ha ka mang tyngka kaba mynta ka samoi.
Ha kane ka jingplie mawnongrim, u bah Warjri u la pynpaw ïa ka sap ba dang mih jong ki samla ïalehkai phutbol ka Ri Bhoi bad pynskhem biang ïa ka jingangnud jong ka sorkar ban tei ïa ka sap ïalehkai ba pura ha kylleng ki bynta jong ka jylla.
“Kine ki jingbei tyngka ha ka liang ka jingïalehkai ki dei kiba la pynlong da ka jingngeit jong ngi ba kin ïarap ban pynurlong ïa ki thong ba jrong por ba la kdew ha ka polisi ïalehkai jong ka jylla jong ngi,” ong u bah Warjri.
U myntri u la ai khublei ruh ia u bah Jeffery Kharmawlong uba dei u traishnong, uba dang shen u la ioh ban khur ar tylli ki takma rnong na ka bynta ka ri India ha ka lympung ialehkai XXIII Asian Arm Wrestling bad XXII Asian Para Arm Wrestling Championship kaba la long ha Delhi naduh ka 3-11 tarik Naitung.
U MLA ka Umroi Constituency u Bah Damanbait Lamare kum u symbud kongsan u la kdew ba kane ka jaka kan long kaba nyngkong eh ha ka dong mihngi jong ka Ri Bhoi bad pynshlur ïa ki samla ba kin pyndonkam ïa ka ha ka rukom kaba tei.
U Chief Secretary ka Jylla bah DP Wahlang u la ai jingmut ban buh ia ki light bad ki kor kiba pyndonkam da ka bor sngi ha katei ka jaka bad ai jingmut ia ki nongialam shnong ban shna ia ka rukom kamai na ka bynta katei ka jaka. U la pyntip ba ka 21 tarik Jymmang, 2026 kaba dei ka sngi Meghalaya Day, kum ka tarik ba la buh thong ban pyndep ia kane ka projek.
Ia kane ka prokram la pynlong da ka tnad Sports & Youth Affairs ryngkat ka jingiatreilang bad ka Dorbar Shnong Nongsder bad ka Nongsder Social Cultural & Sports Association. Ki nongsynshar shnong, ki heh sorkar, ki nonghikai bad ki khynnah skul kiba la wan ban iashim bynta lang.