U Myntri Rangbah ka Jylla, Conrad K. Sangma u la pynbna bad pynthikna paidbah ba ka Jylla Meghalaya ka la long ba la pynkhreh ban pdiang (host) ia ka National Games 2027 kaba dei ruh ka lympung ialehkai kaba heh tam ha ka Ri India. Kane ka lympung ka dei ka sien ba nyngkong ba ka Jylla Meghalya ka la ioh ia ka kabu ban pdiang bad khlem da artatien hadien ba la ioh ia kane ka khubor, ka Sorkar Jylla hapoh ka jingialam jong ka Sorkar MDA 2 ka la mynjur ban shim ia kane ka kabu kaba khraw.
Ha kaba iadei bad ka jingmih ki khubor ba ka jingailad ia katto katne ki jingialehkai sha kiwei ki jylla kan dei lehse ka jingbym lah ka Jylla ban shimkhia bad pynbiang lut bad lehse ka dei ruh na ka jingbym lah ban kot bor, ban kham shai shuh ia kaei kaba u Myntri ba khmih ia ka Tnad Ialehkai ka Jylla u Bah Shakliar Warjri u la pyntip ha kane ka taiew ba lah dep, u Myntri Rangbah u la ong “Ka Indian Olympic Association (IOA) ryngkat bad ka Sorkar India ka la ai jingmut ha kaba iadei bad ka jingkhmih lynti ban ioh bad mad ia kane ka lympung kaba kham pher, kaba wanrah ruh ia ka jinglong kawei bad kaba jop, ka IOA bad ka Sorkar ka la ai jingmut ba ka bha shibun ban ai bynta lang katto katne na ki jait jingialehkai ha kawei na ki Jylla kiba don ha ka thaiñ Shatei Lam Mihngi (North East India). Kumta ka Meghalaya ka dei tang ma ka kaba pdiang ia kane ka lympung ha u snem 2027 bad kam don ka jingkylli ka ban ong ba ka dei ka jingiasnoh kti lang ban pdiang lang bad kiwei ki jylla bad kane jingai kabu sha kiwei ki Jylla kan dei tang na ka bynta ka jinglong kawei ki jylla ha NE.
U Conrad u la pyntip ba ka Jylla kan shim khia ruh ban pdiang na ka bynta ka sngi sdang ne ka jingplie pyrda ia kane ka lympung (opening Ceremony) bad kumjuh ha ka sngi ba pynkut (closing ceremony).