Ha ka jingleit ban sakhi da la ki khmat ia madan Shillong Sports Association (SSA), Polo Shillong kaba dang iaid mynta ha ka jingmaramot ia ki nala um, ki jaka shong ia ki nongpeitkai, ka tnum, ki jingpynbit pynbiang ia jaka khreh bad kiwei kiwei, u Myntri Rangbah ka jylla Conrad K. Sangma u la ai ia ka jingpyntikna ban pyndep noh ia baroh ki kam basah hapoh 9 sngi kata ha shwa ba yn sdang noh ki aïom ïalehkai na ka bynta ki League bapher bapher ia kiba yn pynlong ha kane ka madan.
U Myntri Rangbah u la pynkynmaw ba ka madan SSA kadei ka madan ba la pynlong ia baroh ki lympung ba la pyniaid da ka jylla. Kumta, kane ka madan ka donkam shibun ia ka jingpynbha. Ym tang katta, ia ki katto katne ki jingialehkai I-League ba la pyniaid da ka All India Football Association (AIFF) ruh la pynlong ha katei ka madan.
Ha ka jingiakynduh bad ki Nongïalam bad dkhot ka SSA, u Myntri Rangbah u la iathuh ba ki la angnud ba un shimkhia na ka bynta ban pynkylla dur thymmai bad ban pynsted ia ka kam “ngi la khot ia ki engineer bad baroh kiba trei ia kane ka kam ba kin pyndep noh ia kane ka madan kham kloi namar ngi sngewthuh ba ki league ki la sdang bad ngim lah ban iai bteng ban pynkynriah ia ki tarik ïalehkai ba la buh. Ngi ngeit ba tang hapoh 8-9 sngi la lah ban pyndep noh. Ka jingsuki ban pyndep ia kane ka kam ka dei ka jingbym lah ban pyndep ia ka plan kaba nyngkong”.
U Sangma u la ong ruh ba ia kane ka madan yn pyndonkam ruh na ka bynta ka National Games 2027, kumta ka jingmaramot mynta u snem ka slem namar la hap ban pynkylla shibun na ka bynta ka jingmyntoi ia kaba hadien ruh.
