Ka kynhun ïalehkai jong ka Khanduli Sports Club kala long syndon ka lahduh haka ‘2nd Open To All Knockout Football Tournament 2025’ kaba la pynlong da ka Dorbar Shnong Namdong-B, West Jaiñtai Hills District.
Haba phai sha ka jingïakhun phainal la sakhi ba ka jingïalehkai kala long kaba itynnad hapdeng ki ar kynhun wat hapdeng ka jingpynthut jong u slap. Na ka liang ka kynhun Khanduli ha ka minute kaba 20 kala ïoh ban thep ia ka kol ba nyngkong lyngba ka penalty bala thep da u Deepson Tabi. Na ka liang jong ka Namdong CSA Sport Club kala ïakhun doh ïap ban pynphai ïa katei ka shikol hynrei kam ïohlad satia namar ka jingtbit jong u nongapkol ka Khanduli SC.
Haduh ba kut jong ka por ïakhun ka Khanduli kala jop da 1-0 kol, lyngba kane ka jingjop ka Khanduli SC kala ïoh khur ïa ka song pisa kaba 1,00,000/- shi lak tyngka katba ka Namdong CSA kala ïoh 60,000/- hajar tyngka.
Ïa kane ka jingïakhun phainal la wan ban pynhap pyrda da u Founderson Syngkon ha ka jingdonlang u Army Lipon President Synjuk Waheh Shnong Ri-Lum Jaiñtia, kynthup ïa kiwei de ki Waheh Shnong kiba la shah khot sniawbha ha kane ka sngi.
