Ïa ka lympung ïalehkai phutbol jong ki khynnah skul kaba la tip kum ka ‘District Level Inter School Subroto Mukherjee Cup Football Tournament-2025’ bala pynïaid da ka ophis u District Sports Officer (DSO) West Jaiñtia Hills District, la pynhap pyrda noh mynta ka sngi 13 tarik u Jylliew ha madan Kiang Nangbah Stadium, Dongmihsngi, Jowai.
Haba phai sha ka jingïakhun Final mynta ka sngi ha baroh lai tylli ki kyrdan ka Under-17 (Boys & Girls) bad ka Under-15 (Boys), ha ka Under-17 (Girls) ka kynhun jong ka North Liberty H/S School kala jop da 2-0 kol ïa ka Kiang Nangbah H/S School.
Ha ka Under-17 (Boys) ka jingïakhun kaba la long hapdeng ka St. Dominic H/S School pyrshah ïaka Govt. Boys H/S School kala long kaba ïakhaid bha haduh ba kut jong ka por bala buh kila ïoh ban thep mar shikol 1-1. Kumta la hap ban pynïakhun noh ïa ki da ka jingïashut Tie Breaker ha kaba ka Govt. Boys H/S School kala jop da 3-2 kol.
Katba haka Under-15 (Boys) ka North Liberty H/S School kala jop da 1-0 kol ïa Marian Hills H/S School, ïa ki khusnam sha ki nongjop la sam da u DSO, ki nongkitkam ka WJDSA nalor kiwei de.
Lyngba kane ka jingjop jong ka North Liberty H/S School haka Under-17 (Girls) & Under-15 (Boys) bad ka Govt. Boys H/S School haka Under-17 (Boys) kin ïoh lad ban leit mihkhmat ïa ka District sha ka State Level Inter School Subroto Mukherjee Cup Football Tournament mynta u snem.
