Ha ka U-15: Jop ka YSWSC, Syndai Jr FC, Nongshiliang Pdengshakap bad War Jaiñtia VYT
Ka Amlarem Sub-divisional Sports Association (ASSA) ha kane ka 14 tarik mynta u bnai kala sdang ïaka jingïalehkai phutbol kaba la tip kum ka ‘Independence Day Cup-2025’, haka kyrdan Under-15 na ka bynta ki khynnah shynrang bad kynthei, katba ha ka kyrdan Under-13 pat ka long tang na ka bynta ki khynnah shynrang.
Ïa kane kaTournament la pynlong ha ka Madan phutbol Jaraiñ, Amlarem Sub-divisional na ka daw ka jingpyntrei ïa ka Mini Stadium jong ka Association kaba don ha Ladjaplem.
Ha katei ka sngi sdang la pynïalehkai saw tylli ki jingïakhun haka U-15 ki khynnah shynrang, haka jingïakhun ba nyngkong ka YSWSC Nongbareh Lyntiar kala jop da 5-0 kol ïa ka Sohlawiat SC, ïa kitei ki kol la thep da u Fredrick Dhar ha ka minit ba 22, u Evermoon Suting haka minit ba 25, u Amiwan Suting ha ka minit ba 51, u Tiyus Khonglah haka minit ba 55 bad u Ricky Pohlong haka minit ba 57.
Haka jingïakhun kaba ar ka Syndai Jr FC kala jop da 1-0 kol ïa ka Satpator United, ïa katei ka shikol la thep da u Forlan Syndai haka minit kaba 53.
Ha ka jingïakhun kaba lai ka Nongshiliang Pdengshakap kala jop da 3-1 kol ïaka YFC Trangblang, ïa ki kol naka Nongshiliang Pdengshakap la thep da u Biyes Surong haka minit ba 23, u Feri Surong haka minit ba 43 bad u Hame Tariang haka minit ba 44. Katba ïa ka shikol na ka YFC Trangblang la thep da u Adoni Pohkyrnu haka minit ba 35.
Katba ha ka jingïakhun kaba saw ka kynhun jong ka WarJaiñtia Veterant Youth Team kala jop da 2-0 kol ïa ka Hynriam YSWSC, ïa kitei ki kol la thep da u Jefferson Pohlong haka minit ba 40 bad u W. Phawa ha ka minit ba 48.
