U Johnny Nongrum uba dei u snar iakura uba la paw bad wanrah burom ruh ia ka Jylla lyngba ki jingjop ha ki lympung bapher bapher u la rai ban shongthait noh na ka jingiaid lynti kum u nongialehkai boxing/Muay Thai da kaba mynjur ban pynkut ia kane ka kam ïalehkai ha ka jingiakhun kaba khatduh pyrshah ia u Anurag Singh na ka Jylla Uttarakhand.
Katei ka jingiakhun kaba dei ruh ka lympung Shillong Cage Fighting Championship ia kaba yn pynlong ha Lariti Multi-Purpose Hall kan dei ruh ka rynsan ka ban sei ia ki sap jong ki samla kiba na kane ka jylla lyngba ki thup (category) bapher bapher ia kaba yn pynlong ha ka 28 Tarik mynta u bnai.
U Johny Nongrum, uba la don mynta 36 snem ka rta u ioh bha ia ka jingithuh ha ka Ri na ka jingjop ia ka lympung Indian Series Fighting ia kaba la pynlong ha ka jylla Uttarakhand ha u snem 2022.
