Mynta ka sngi kila don haduh 800 ngut ki rang bad ki thei ialehkai jong ka jylla ha ki jingialehkai bapher bapher kiba la wan ban pynrung kyrteng ialade na ka bynta ka Selection Trial ban ioh iashim bynta sha ka National Games 2027 kaba 39 jong ka ri ka ban sa pynlong ha jylla Meghalaya ha u snem 2027.
Napdeng kine ki 800 ngut, 148 ngut ki dei na ri lum Jaiñtia, 308 ngut na ri lum Khasi bad 352 ngut na ri lum Garo. Ia kine ki rang bad thei ialehkai yn jied ha ki bynta bapher bapher.
Na ka bynta ka ki rang bad thei ialehkai jong ka East bad West Jaiñtia yn pynlong ia kane ka Selection Trial ha Wahiajer Stadium ha ka 28/June/2025 naduh ka por 9:00 mynstep.
Na ka liang jong ki nongpyniaid jong ka Meghalaya Athletics Association (MAA) kila pyntip ba ka jingjied ia ki rang bad thei ialehkai ha ka thup Running, ka Jumping bad ka Throwing, yn pynlong ha Wahiajer Stadium lashai ka sngi nanduh ka por 9 baje mynstep na ka bynta ka East bad West Jaiñtia Hillls.
Na ka bynta ki rang bad thei ialehkai jong ka East Khasi Hills, Eastern West Khasi Hills, Ri Bhoi, South West Khasi bad West Khasi Hill, yn pynlong ha SAI, STC, Shillong ha ka 5/July/ 2025, naduh ka por 9 baje mynstep.
Na ka bynta jong ki rang bad thei ialehkai jong ka East Garo Hills, North Garo Hills, South Garo Hill South West Garo Hills bad West Garo, pat yn pynlong ha nongbah Tura bad ia ka jaka ba thikna yn sa pyntip kham hadien. Ia kane yn pynlong ha ka 12/July/2025 naduh ka por 9 baje mynstep shaneng.
