Ka Meghalaya sa shisien ka la long kum kawei na ki jylla ban pdiang biang ïa kane ka lympung ialehkai football kaba rim tam ha ka pyrthei.
Ha kane ka sngi la plie paidbah ia 3 tylli ki khusnam jong ka Indian Oil Durand Cup kaba 134 ha state Convention Centre Shillong. ka jingpyni ïa ki trophy kam dei tang ka jingsdang jong ka jingïalehkai kaba pawnam hynrei ka pynpaw ruh ïa ka jingangnud kaba nangroi jong ka jylla ban mih kum ka jaka ïalehkai kaba kongsan jong ka India.
Ki trophy kin leit ha kylleng jong ka meghalaya kynthup ïa ka Shillong, Nongstoiñ, bad Tura, kaba ailad ïa ki nongkyrshan ban sakhi ïa kine ki dak ba pawnam jong ka phutbol jong ka Asia,shwa ba kane ka lympung kan sdang .
Ïa kane ka roadshow la plie paidbah na ka State Convention Centre ha ka jingïadon lang u Myntri Rangbah ka jylla u Conrad K Sangma, u Myntri ka tnat ïalehkai u Shakliar Warjri, u Air Marshal Suraj Singh, u Air Officer Commanding-in-Chief of Eastern Air Command, u Lieutenant General Sanjay GOC Malika,100. U Mohit Malhotra, AVSM, SM, COS HQ Eastern Command & Chairman DCOC, ryngkat kiwei pat ki heh shipai bad ki nongmihkhmat sorkar.
Haba kren ha kane ka jingïalang, u Myntri Rangbah ka Jylla Conrad K. Sangma u la pynpaw ïa ka jingsngew sarong ban pynlong biang ïa ka jingïalehkai phutbol kaba phra kaba la rim tam ha ka pyrthei. “Ngi sngewnguh shibun ia ki shipai India kiba la jied ia ka nongbah Shillong kum kawei na ki jaka ban pynlong ia ka Durand Cup kaba 134. Ngin sa pynlong ia ki 8 tylli ki jingialehkai ha ka J.N. Sports Complex, bad hadien ka jingjop kaba khraw ha u snem ba la dep ha kaba ïadei bad ka jingwan ki paidbah bad ki jingpynbeit, ngi ngeit skhem ba ngin sa pynpoi sa kawei pat ka aiom kaba sah jingkynmaw. Da ka jingbun ka jingïashim bynta na ki team trai ri, mynta u snem ka kular ban long kaba kham pynshongshit shuh shuh ïa ki nongkyrshan jong ka Shillong bad ka Meghalaya,” u la ong.
Haba pynpaw ïa ka jingangnud jong ka Sorkar ban kyntiew ïa ki jingïalehkai ha ka jylla, u Myntri Rangbah u la ïasam ba jan 70% na ki jingtei ïalehkai jong ka Meghalaya mynta la tei ha kine ki hynriew snem ba la dep, da ka jingbei tyngka kaba kumba ₹2,000 klur. U la pynbna ruh ïa ki jingthmu na ka bynta ka Mawkhanu Sports Complex, kaba la thmu ban long ka madan ïalehkai phutbol kaba heh tam ha ka ri India, ryngkat bad ka jingpynroi ïa kiwei pat ki jaka ba kongsan kum ka J.N. Sports Complex, Mawdiangdiang Sports Complex, P.A Sangma Sports Complex ha Tura, Integrated Hospitality and Sports Complex ha Shillong, Wahiajer Sports Complex ha Jowai, bad ka PA Togan Athletic Stadium ha Tura. Nalor kata, man la ka jaka treikam jong ka distrik kan sa don shen ia ka madan ialehkai.
Haba pynskhem biang ïa ka jingthmu jong ka sorkar, u Myntri Rangbah ka Jylla u la ong ba kine ki jingbei tyngka ba kongsan ki dei shi bynta jong ka thong ba kham heh ban pynkylla ïa ka nongbah Shillong sha ka nongbah phutbol jong ka India. U la shim por ruh ban pynkup burom ïa ki shipai India, da kaba ïaroh ïa ka jingshlur bad ka jingtrei shitom jong ki ha ka por jong ka Operation Sindoor.
U Myntri ka tnad ïalehkai u Shakliar Warjri, ha ka jingkren jong u, u la kren shaphang ka jingieid ba jylliew jong ka Meghalaya ïa ka phutbol, da kaba pyrkhat halor ka jinglong jingman kaba pynkhih bor ding ha ka por ba ïalehkai ïa ka Durand Cup ba la dep. U la pynpaw biang ïa ka jingkular jong ka sorkar ban pynbiang ïa ki lad jingïalehkai kiba pawnam ha ka pyrthei, da kaba pynpaw ïa ki jingthmu ban tei ïa kawei na ki madan ïalehkai phutbol kaba heh tam ha Asia ha Mawkhanu, kaba lah ban shong 40,000 ngut. U la pynksan shuh shuh ïa ka jingthmu ba jrong jong ka jylla ban pynmih ïa ki nongïalehkai Olympic na Meghalaya. Kaba kham kongsan ka long ba u Myntri ka tnad ïalehkai u la kdew ruh ïa ka jingai jingïarap kaba ₹39.17 klur sha ki 26 tylli ki seng ïalehkai.
