Ki Samla iakhunkti ka Jylla kiba la leit ban iashim bynta sha ka lympung National Arm Wrestling Championship, Kerala lyngba ka kynhun Meghalaya Arm Wrestling Association (MAWA) ki la ioh ban wanrah burom ia ka Jylla baroh kawei ha kaba ki la ioh ban khur haduh 52 tylli ki takma kynthup 25 tylli ki takma Ksiar, 15 tylli ki takma Rupa bad 12 tylli ki Takma Rnong.
Kane ka jingjop don burom kan dei ruh ka khana pateng ka ban sah kynmaw ha kaba ka Jylla ka la ioh ban thaw rekod ha ka sien ba nyngkong da kaba khur haduh 52 tylli ki takma kaba dei ruh ka sien ba nyngkong ban ioh bun tam ki takma na ki lympung kiba heh.
Napdeng 52 ngut kiba la leit ban iashim bynta ha ki thup ialehkai kum ha ka Para Athletes, Masters, Juniour, Youth, Senior, 22 ngut ki dei ki kynthei, 22 ngut kiba duna dkhot met. Na kitei kiba duna dkhot met, 10 ngut ki la khur takma, kynthup 14 tylli ki takma ksiar 3 tylli ki takma Rupa bad kawei ka takma Rnong.
Kaba kham sngewtynnad ka long ba ha katei ka jingleit ban iashim bynta, la khur ruh 3 tylli ki trophy kynthup ia ka Overall Championship Para Men and Women, Overall Championship Men and Women, Team Championship Men and Women bad baroh 3 tylli ki trophy ki dei ha ka kyrdan 1st Runners Up.
Ha ka jingioh ban iakren bad u Bah Junestar Kharbuli, President ka MAWA, u la ong ba ka jingleit ban iashim bynta mynta u snem ka long kaba khampher ha kaba la ioh ia ka jingkyrshan na ka Sorkar bad katto katne ki riewshimet. U la ong ba kane ka jingjop kam dei kaba kut hynrei ka dei ka jingsdang jong kiei kiei kiba thymmai na ka bynta ban pynkhreh ruh ia ka lympung kaba heh tam, kata ka World Championship.
U Bah Kharbuli u la ong ba shibun ki lympung kiba ban dang hap ban pynkhreh nangne shakhmat “kawei na ki thong kaba heh jong ngi kadei na ka bynta ka National Games 2027 (Meghalaya)” iathuh u Bah Junestar ia ka jingangnud ban ioh pynkhreh naka bynta ka lympung 2027 ia kaba yn pynlong ha kane ka Jylla.
Shuh shuh u la ong bad ai ruh ia ka jingpyntip na ka bynta ki samla donsap kiba don ha ki distrik bapher bapher ba yn don ruh ka program ban jied ia ki nongialehkai iakhunkti ha une u bnai shi bynta ban pynkhreh ia ki lympung ki ban sa wan.
