Ka Kudo Association of Meghalaya kaba la ioh jingithuh na ka Kudo International Federation of India bad ka Ministry of Youth Affairs & Sport jong ka Sorkar India ka la wan pyntip paidbah ha ka 19 tarik Naitung 2025 halor ka jingmih thymmai jong kane ka kynhun Kudo Association of Meghalaya (KAM).
Haba kren bad ki nongthoh khubor u President kane ka kynhun u Bah Pynshai Mawrie u la pynpaw ka Kudo Association of Meghalaya ka dei kaba dang shu mih thymmai ha jylla Meghalaya bad kane ka jingialehkai ka iasyriem kum ka jingialehkai Martial arts.
Shuh shuh u la ong kane ka kynhun ka don ia ka headquarters ha Upper Lumparing Shillong bad ka office ka don ha Mawlai Phudmuri.
Haba iadei bad kane ka jingialehkai Kudo u President kane ka kynhun u la pyntip ba ki khynnah kiba don ha kane ka kynhun ki don kumba 50 ngut eiei bad kin sa don shuh shuh ki khynnah ki ban dang wan pyniasoh sha kane ka kynhun na ka bynta ki jingialehkai bapher bapher.
U la pyntip ba ka Kudo Association of Meghalaya kan sa pynlong ia state level Kudo ha u bnai ban wan ka ban sdang naduh ka 21 tarik Nailar haduh 23 tarik Nailar.
Kane ka jingialehkai ka iasyriem thik kum ka jingialehkai MMA ba la tip kum ka Japanese Traditional combat Sports, bad ki don Full Guard naduh khlieh haduh kjat.
Shuh shuh u la pyntip ki khynnah ki ban sa wan iashim bynta sha kane ka jingialehkai Kudo ki kynthup na West Khasi Hills, Eastern West Khasi Hills, Ri bhoi bad kiwei kiwei ki District.
U la kyntu ruh ia ka sorkar lyngba ka tnad ialehkai ba kan pynrung ia kane ka jingialehkai Kudo ha ka National Games ka ban sa long shen ha u 2027 ha Jylla Meghalaya.
