Ka Meghalaya Boxing Association (MBA), ha ryngkat ka jingïatreilang bad ka Jaintia Boxing Association, ka la pynlong ïa ka jingjied ia ki nongialehkai kaba la tip kum ka District-Level selection trial ha kane 24 tarik Naitung kum shibynta ban pynkhreh na ka bynta ka 39th National Games, kaba la buh ban pynlong ha ka jylla Meghalaya ha u snem 2027.
La pynlong ïa ki trial ha ki ar District jong ka Ri Lum Jaintia, ha Bishop House, Lumbihsyntu, Mihmyntdu na bynta ka West Jaintia Hills, bad ha Indoor Hall jong ka East Jaiñtia District Sports Association ha Dkhiah East na bynta ka East Jaintia Hills.
La don 36 ngut ki samla ialehkai boxing kiba la shim bynta ha katei ka trial, ha kaba 21 ngut ki dei na West Jaintia Hills bad 15 ngut na East Jaintia Hills, ha ki category bapher-bapher katkum ka jingkhia (weight category) jong ki nongialehkai.
Ia kane ka trial selection la lamkhmat da u Lari Kharpran, uba long u Technical Director and Head Coach for National Team Preparation, ha ka jingiadonlang u President ka MBA u Cornelius Kharhunai, Secretary Dondor Marwein, Joint Secretary Khrawkupar Kharmawphlang, Executive Member Hubirth Marbaniang, u President ka Jaintia Boxing Association Wanbait Ksoo bad Joint Secretary, Join Secretary Jimy B. Shadap.
Hadien ka trial, yn jied 4 ne 5 ngut ki samla ba tbit ban leit sha ka training camp kaba kyrpang ha Shillong. Ynda la dep ka jingjied, yn bteng sa ka state-level training programme kaba kham bniah shuh shuh la pyntip ki nongpyniaid.
