Ka Klob Shillong Lajong FC ka la pynshaiong ia kiba bun hynne ka sngi ha ka jingiakhun kaba nyngkong na ka bynta ka lympung Durand Cup 2025 ha kaba ka la pynliem haduh 6-0 kol pyrshah ia ka kynhun shipai, ka Malaysian Armed Forces ha ka jingialehkai ba la pynlong ha madan Jawaharlal Nehru Stadium, Polo Shillong.
Katkum ka jingkhmih lynti jong ki paidbah, la ong ba ka Lajong kan ym lah shuh ban ïalehkai bha kum ha ka snem ba lah dep, kata da kaba poi shaduh ka Semi final jong kane ka lympung na ka daw ba kane ka kynhun mynta ka samoi ka la pyllait lut ia ki snar ïalehkai kiba tbit kynthup ia 3 ngut ki rangialehkai na Brazil. Ka jingtbit jong ka Lajong ha kane ka sngi ka la pynkmen ia ki nongkyrshan jong kane ka klob bad khmih lynti ruh ba kin lah ban ïalehkai kham bha shuh shuh sa 2 tylli ki jingialehkai kiba dang sah na ka bynta ka group E kaba kynthup ia ka Rangdajied United FC bad North East United FC.
Ha kane ka jingiakhun, u Everbright Sana u la ioh ban pynkhih jar nyngkong kata ha ka minit ba 12 bad ka jingiakhun ha ka kylla step ka la kut noh da 1-0 kol.
Hadien ba bteng biang ka kylla miet, ka Lajong ka la ïoh biang ban thep kol lyngba u Phrangki Buam (47,49), sa shikol na u Jana, bad mar shi kol na u Tremiki Lamurong (73) bad na u Deibormame Tongper (90+5).
Ka Lajong kan bteng biang ia ka jingiakhun ha kane ka lympung pyrshah ia ka Rangdajied United FC ha ka 29 Tarik mynta u bnai por 7:00 janmiet.
