[Da u M.M. Thaiang]
Katto katne shaphang u Ma (L) Albin Lamare u briew uba la trei bun ki kam naduh ka kam sharai Masi, ka kam Nonghikai bad ka kam sharai Ri. La kha ïa u ha ka 8 tarik Iaiong (April) 1931 ha shnong Nangbah na ka ïing ka sem wat la kam long kaba riewspah hynrei pat kaba donburom, kaba tipbriew tipblei, tiplok tip jor, tipkha tipman, tipkher tipmer. U Kpa jong u, u Shondro Tariang bad ka Kmie pat ka Kurimai Lamare.
Ki kmie ki kpa ki la phah skul ïa u naduh dangrit. U la sdang ka jingleit skul ha la shnong ha Nangbah bad u la pyndep ïa ka jingpule Lower Primary School ha ka snem 1945. Hadien ba u la pass ïa ka jingpule Lower Primary School, ki kmie ki kpa ki la phah sharai Masi bad hadien shisnem shiteng, ki kmie ki kpa ki kwah ba u khun jong ki un nangkot nangsla, nangthoh nangtar, nangkheiñ nangdiah ki la rai ban phah skul ïa u bad la phah ïa u ban leit pule M.E School (Middle English) ha Jowai bad u la ïaineh haduh ba u la pass ia ka Matric. U la pass ha ka 1st Division bad u la ïoh ïa ka Merit Scholarship. Ki kmie ki kpa kim shem jingeh ban kyrshan leit skul ïa u naba u long u briew u bym leh lutphut. Ha u Ma Albin la ong ba um tip ïa kata ka Patlun jrong ne kata ka Patlun jynsur u phong beit tang da ka Patlun lyngkot bad pyndonkam tang da kawei ka Jaiňkup naduh M.E haduh ba u la pass Matric.
U ma Albin Lamare u long u briew uba stad bad uba proh jabeiň, ki kmie ki kpa ki la phah ïa u ban leit pule I.A ha St Anthony College Shillong bad u la pass Ia ka B A English Honour ha ka snem 1960 ha ka 1st Division. Ha baroh shilynter ki sngi college jong u, u hap leit trei mynsngi ha Ophis u Deputy Comisioner Shillong. Hadien ba u la pass ïa ka B.A, u la ïathoh shongkurim bad ka kong Prelis Laskor kaba na ka shnong Nangbah hi. Ki la ïoh laingut ki khun, arngut ki kynthei bad uwei u shynrang, kita ka Monika, u Larmoti bad ka Christina.
Ha ka snem 1961, u la iehnoh ïa ka kam na D.C. Ophis Shillong bad wan trei kum u Process Assistant ka Thadlaskeiň Development Block Thadlaskeiň. U la neh shipor ha kane ka kam. Kum u briew uba ïeid ïa ka jingnang jingstad bad ban ai ka jingnangkot nangpule ïa ki briew, u la pdiang ïa ka jingkhot ban seng ia ka Proceeding High School ha shnong Shangpung. U la neh ha ka kam hikai ha Shangpung haduh ka snem 1965. Nangta u la leit sha Jowai ban hikai ha Marianhill High School, Jowai bad neh haduh ka snem 1977.
Kum u Nonghikai, ha ka por ba u hikai skul ha Marianhill u la ïengïaleh ia ka kam MDC na Nangbah MDC Consituency ha ka snem 1973 bad u la jop. Nangta ha ka snem 1978 u la ïeng ïaleh ïa ka kam MLA na ka Nangbah-Wahiajer L.A Constituency na ka seng APHLC. U la ïaineh ha ka seng APHLC hapdeng ka jingatphyllung ka duriaw bah ka saiñhima sima hapoh ka APHLC ha kata ka por.
Ha kane ka jingatphyllung ka duriaw bah ka saiň hima sima hapoh ka seng APHLC u la ïoh shibun ki jingtyrwa ban long heh long haiñ, hynrei ha khmat jong u Ma Albin Lamare ka spah bad ka burom pyrthei kim don dor ei ei. U long kum u diengbah lane u Mawlong u bym lah ban pynkhih bad dei ha kane ka por u la seng ïa ka Nangbah Proceeding High School ha ka snem 1978.
U long u briew u ba ïohi jngai, uba kyntu uba kynrong ïa ka jaitbynriew ha ka imlang ka sahlang bad u ba kitkhia shibun ha ka kam shakri Blei lyngba ka Balang bad kane ka paw ba naduh ba la jied tymmen basan ïa U ha ka snem 1962 ha ka Balang Presbyterian Nangbah.
U Ma Albin Lamare u long u briew uba jai jai uba jemnud, u bakhraw ka jingïaishah. Um ju bun ktien, hynrei haba u kren ha ïing dorbar lane ha kano kano ka jingïalang paidbah, ki briew ki da hap pyrkhat jylliew. Haba u hikai lada ki khynnah skul ki shah shkor ïa ki jinghikai jong u ym da donkam eh ban pule ïa ka text book. Ki khynnah skul ki pyrto ïa ka jinghikai jong u. Kum u nonghikai um ju kham pep ban wan hikai naba u sngew halade lada um wan hikai ka long ka jingduh ka bakhraw ïa ki khynnah skul jong u.
Kum u Nongmihkhmat paidbah um ju shongthait dalade ngung shingung sha ki Department Sorkar bapher bapher ban leit ïa kynduh ïa ki Officer na ka bynta ki kam pynroi ri hapoh ka Constituency jong u bad haba um lah ban wan dalade pynban um ju sangeh ban thoh sha ki Ophis Sorkar wat hapdeng ka jingthiah pang jong u ha u bnai Jymmang (May) 1982, ha Civil Hospital Jowai.
Ki matti jong u Ma Albin Lamare, nalor ka proceeding High School ha Nangbah ïa kaba la tip mynta kum ka Albin Lamare Secondary School, ka surok Jowai-Nangbah Khanduli, ki surok shnong hapoh ka shnong Nangbah bad ka surok Nangbah- Nongjngi. U la khlad noh na kane ka pyrthei ha ka 27 tarik u Jymmang (May), 1982, ha ka jingsahnud ïa kiba bun ki projek kiba dangsah teng kiba u dei ban pyndep kum u Nongmihkhmat.
Ïa ka Nangbah Proceeding High School, kaba la seng da u ma Albin Lamare, hadien ka jingkhlad jong u la ai nam ïa ka “KA ALBIN LAMARE SECONDARY SCHOOL” bad la pynïaid ïa ka hadien ka jingkhlad jong u da ka khun jong u hi ka Monika Laskor, MA.
Ha ka jingwan shongkha jong u Dr. Henry Lamin bad ka kong Monika Laskor, kane ka Albin Lamare Memorial Secondary School ka la nangïaid shaphrang bad don ka jingkyrmen kaba skhem ba hadien ba la dep pynbit pynbiang bad pynheh shuh shuh ïa ka ïing skul yn sa kyntiew ïa ka sha ka kynrdan Higher Secondary School bad College lada donkam ïathuh ki Nongpynïaid skul ha une u Nongthoh ha ka sngi rakhe ïa ka jingdap sawphew san snem ka jingkhlad jong u ha une u bnai May 2025. Ha Compound ïingskul ka ïeng kynshreng ka Durmot jong u ma Albin Lamare kum ka jingkynmaw ieid ïa u kum u Nongseng jong kane ka Skul.
