Ka jingïalehkai phutbol jong ka ‘Independence Day Cup Under-17 Football Tournament 2025’ bala pynïaid da ka West Jaiñtia District Sports Association (WJDSA), kaba la long mynta ka sngi 8 tarik u Nailar ha madan Kiang Nangbah Stadium Dongmihsngi Jowai.
Ha ka jingïakhun kaba nyngkong hapdeng ka Catholic Youth SC pyrshah ïa ka Tpep-Pale S&YA kala long kaba ïakhaid bha haduh ba kut jong ka por ïalehkai bad kila ïoh ban thep mar shikol (1-1). Hadien kane naka liang ki bor pynïaid kila pynïakhun noh da ka jingïashut (Tie Breaker) ha kaba ka Catholic Youth SC kala jop da 5-3 kol.
Katba ha ka jingïakhun kaba ar ka Ladthadlaboh SC kala pynliem da 3-0 kol ïa ka Dulong FC, ïa kitei ki lai kol na ka Ladthadlaboh SC la thep da u Pynbeitmiki Ryngkhlem ha ka minit ba 29 bad u Alfred Dkhar ha ka minit ba 45 & 58.
