Ka Klob North East United FC kaba dei ka lahduh (Champion) jong kane ka lympung ha une u snem ba lah dep ka la ioh ia ka kabu ban rung biang sha ka final jong kane ka lympung kaba la rim tam ha ka dewbah Asia lyngba ka jingjop da 1-0 kol pyrshah ia ka Shillong Lajong ha ka jingiakhun ba la pynlong ha madan Jawaharlal Nehru Stadium Polo, Shillong.
Ia katei ka shikol la thep lyngba u rangialehkai na kane ka jylla, u Samla Redeem Tlang ha ka minit ba 36.
Naduh u snem 2023, kata ha ka snem ba ka Shillong ka la sdang ia ka jingiakhun pyrshah ia ka North East na ka bynta ka lympung Durand Cup, ka Lajong ka khlem pat ioh kawei ruh ka jingjop, kynthup 2 tylli ki jingialehkai mynta u snem.
Watla ka jingialehkai ka long kaba itynnad hynrei la iohi pat ia ka jingdiaw jong kiba bun ki paidbah kiba la tuid ban ap tiket naduh mynstep (kynthup na nongkyndong) namar bun ki bym ioh lyngba ka online, hynrei kaba la pynbitar shuh shuh ia ki paid ieid phutbol ka long ba ia ki tiket ki la dep die lut (sold out) naduh mynnin ka sngi ka 18 tarik.
Lyngba kane ka jingiaid lynti ba ki paidbah ki mad naduh u snem ba lah dep, bun kiba la kyrpad ia ka Sorkar lyngba ka tnad Meghalaya Sports and Youth Affairs bad ia u Bah Shakliar Wajri – Myntri ba khmih ia ka tnad ïalehkai ban pynbiang ia ka madan kaba heh kaba ñiam palat 50 hajar khnang ba baroh kin ioh ban sakhi ia kum kine ki jait lympung kiba heh. Ha kane ka sngi ki nongwanjngoh kai ki la poi haduh 14,900 ngut tam (full capacity).
Ka jingiakhun final kane ka lympung kan long ha ka 23 tarik mynta u bnai ha nongbah Kolkata.
