Khot ka MRWA ban ai kyrteng ban ïoh jied sha ka iakop king lieng jong ka National Games

Kum shi bynta ka jingpynkhreh na bynta ka 39th National Games, kaba yn sa pynlong ha ka jylla Meghalaya ha u snem 2027, ka Meghalaya Rowing & Water-Sports Association (MRWA), ka la pyntip halor ka Rowing Talent Identification Programme kaba yn pynlong ha ka jylla hi baroh kawei. Kane ka jingthmu ka long ban wad bad ai jinghikai ïa ki samla kiba don sap ha kane ka jait sport, kiba lah ban mihkhmat ïa ka jylla Meghalaya ha kane ka lympung bah jong ka ri.
Kiba lah ban apply kin long na bynta ki samla kiba shong ba sah ha Meghalaya, kiba don hapdeng ka rta 18 haduh 22 snem. Kiba lah ban shim bynta na ka bynta ki kynthei ki dei ban don ka jingjrong ym duna ïa ka 5 phut 5 inchi, katba ki shynrang pat ki dei ban long ym duna ïa ka 5 phut 7 inchi. Yn kham peit kyrpang ïa kito kiba la don lypa ha kane ka jait sport, bad kiba la iashim bynta ha ki jingïakop ha ki kyrdan bapher bapher. Kito kiba kwah iashim bynta ki dei ruh ban lah ban jngi la kumno kumno kumba 50 meter ei ei. Kito kiba kwah ban aplai, ki lah ban phah ïa ki Bio-data lyngba ka Email: meghalayarowingandwatersports@gmail.com ne WhatsApp sha 9089200614.
Ki sngi ba la buh ban pynlong ïa kane ka Talent Scout, ki long kumne, ha Tura ka long ha ka 26 tarik u Nailar, ha Jowai ha ka 6 tarik Risaw, ha Nongstoiñ ha ka 30 tarik u Nailar bad ha Shillong pat ha ka 20 tarik u Risaw 2025.
Ka tarik ba khatduh ban phah ïa ki application ka dei ar sngi shuwa ka sngi ba la buh ïa ka Talent Scout ha man la ki jaka.