Ka lympung ialehkai Badminton, ia kaba la tip kum ka Open To All Master (Veteran) 2025, ia kaba la pyniaid da ka West Jaiñtia District Badminton Association (WJDBA), Jowai, kan sdang noh naduh kane ka 11 haduh ka 13 tarik Nailur (September), 2025. Ia kane ka lympung yn pynlong ha Seiñraij Indoor Hall, Tpep-Pale Jowai.
Ki jingiakhun ha kane ka lympung kaba long tang na ka bynta ki rangbah (Shynrang), kan long ha ka kyrdan bapher bapher. Ha kaba ia ka tarik ba khatduh ban pynpoi ia ki kyrteng (Entry) kan long ha ka 6 tarik Nailur (September). Ka bai registration ka long 2 hajar tyngka, katba ka khusnam ka long 88 hajar tyngka.
Ki kyrdan ha kane ka lympung kin long 75+ Minimum age 35, 85+ Minimum age 40, 95+ Minimum age 45 bad 105+ Minimum age 50. Ia ka rta lah ban pynthikna lyngba ka Identity Card ka Badminton Association of India (BAI) lane u Adhaar Card.
Shuh shuh ka WJDBA, kala pyntip ba ha kane ka lympung kino kino ki nongialehkai na kino kino ki jylla, ki district ne ki riew shimet jong ka Ri, ki lah ban wan iashim bynta ha kane ka lympung. Ha ka juh ka por kan sam ruh ia ki syrnot (Certificates) sha baroh ki nongiashim bynta ha kane ka lympung. Ia ki jingtip ba kham bniah lah ban phone ha kine ki number: 9612623103/9366115391.
