Ka Sorkar Jylla lyngba ka Tnad Ialehkai, ka Meghalaya Sports and Youth Affairs (MSYA) mynta ka sngi ka 29 Nailar 2025 ka la iashim bynta ha ka jingrakhe ia ka National Sports Day kaba dei ruh ka sngi ban burom ia ka sngi kha jong u snar ialehkai Hockey ba paw tam jong ka India, u Major Dhyan Chand.
Ha kane ka sngi la don ryngkat da u Bah Shakliar Warjri – Myntri ba khmih ia ka Tnad Ialehkai, u Bah John Kharshiing – President ka Meghalaya Sports Olympic Association (MSOA), ki nongialehkai bad kiwei kiwei.
Haba ai jingkren ha kane ka sngi, u Bah Warjri, u la iaroh ia ka jingkiew jong ka kam Ialehkai ha ka Jylla bad iathuh ruh ba naduh ba ka Sorkar MDA ka la synshar, kata naduh u snem 2018, ka Tnad Ialehkai ka la iakhun kumno ban kyntiew ia ka Kam ialehkai da kaba ai mynsiem bad pynkup burom khnang ba ki lah ban kiew kham shajrong.
Ha kane ka sngi la pynkup burom ruh ia ka Samla Annisa Lamare kaba dei ka thei ialehkai Niah Thuk Thuk “Mountain Biker” ba nyngkong ban mih khmat na ka Jylla sha ki lympung baheh jong ka pyrthei. Ban ai mynsiem ruh ia kiwei ki nongialehkai kiba duna ka jingioh jingithuh, ka Tnad ka la pynkup burom ruh ia 6 ngut ki nongialehkai kiba duna dkhot met kiba kynthup ia kiba la ioh ban khur Takma Ksiar ha ka Lympung 6th Meghalaya Games kaba dang shu kut shen. La sam ruh ia ki Cheque sha 103 ki nongioh bynta kiba kynthup 76 tylli ki kynhun bad 26 kiba dei shimet lyngba ka YES Meghalaya Scheme.
Ha kane ka sngi ba kyrpang na ka bynta ki Nongialehkkai, u Myntri, u la pynbna bad pyntikna ruh ba ka Sorkar ka la thmu ruh ban buh ia ka Hostel na ka bynta ka jingialehkai ha kaba yn pynlut haduh 100 klur ia kaba yn tei ha Polo, Shillong.
