U Myntri ba khmih ia ka Tnad Ïalehkai (Meghalaya Sports and Youth Affairs – MSYA) ka jylla, Bah Shakliar Wajri hynne ka sngi u la pyntikna ba ka tnad ka la dep ban pynlong ïa ka jingialang bad ki Jylla kiba don ha kane ka thaiñ Shatei Lam Mihngi (North East -NE) na ka bynta ban pynlong ia ka lympung National Games 2027 ha kane ka jylla.
Ha ka jingialang ba dang shen, u Myntri u la iathuh ba ka tnad ka la rai ban ai bynta lang kawei ka jait jingialehkai (Discipline) sha baroh ki Jylla ki don ha kane ka thaiñ NE, kiba kynthup ia ka Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura. U Myntri u la iathuh ba kawei na ki daw ba la rai ban ai bynta sha kitei ki Jylla ka long ban kyntiew ia ka kam ïalehkai bad ban pyni ruh ia ka jingiatylli lang ki Jylla kiba don ha kane ka thain Shatei Lam Mihngi.
Ha kaba iadei bad ka jingpynkhreh ia katei ka lympung kaba heh tam ha India, u Myntri u la iathuh ba ka kam ka dang iaid shaid, la ka long na ka bynta ban shna ia ki jaka ïalehkai bad na ka bynta ban pyntbit ia ki nongialehkai.
Shuh shuh u la iathuh ba la dep ban pyllait ia ka pisa sha ki Association ban pynkhreh na ka bynta katei ka lympung, kata da kaba pynlong ia ka jingïit bad jingjied (trial) ia ki khynnah donsap ha ki district bad ki dong bapher bapher ryngkat ban ai ka jinghikai kiba paka. Nalor kata, u Bah Warjri u la ong ba ka jingpynkhreh ka la dei naduh kine ki khyndiat snem bad ka jingpynlong ia ka Meghalaya Games dang shen ruh ka dei hi shi bynta ban pynkhreh ia ka National Games.
