Ka Nongrim Hills S&CC kaba dei ka klob ba don ha trai duh jong ka miej iakheiñ ha ka lympung Shillong Premier League (SPL) 2025-26, ka la ioh ban mad ia ka jingiakhaid ba nyngkong mynta ka samoi ïalehkai, kata da 2-2 kol ha ka jingiakhun pyrshah ia ka Laitkor SC ha madan SSA Polo Shillong.
Ia kane ka lympung ba la pynlong da ka Shillong Sports Association (SSA) la bteng biang mynta ka taiew na ka bynta ka wat ba 4. Na ki 4 tylli ki jingialehkai, ka Laitkor ka la mad kawei ka nam jop, 2 tylli ki jingïakhaid bad kawei ka nam rem. Katba ka Nongrim kaba khlem pat ioh poin ha kane ka taiew ba lah dep, ka la ïalehkai bha mynta ka sngi ha kaba ka ioh ruh shi poiñ na ka jingbym lah ka Laitkor ban pynkhyllem.
Ia kitei ki kol na ka bynta ka Nongrim la ioh ban thep da u Shanborlang Nongrim ha ka minit ba 45 bad shi kol na u Sandy Kharkongor ha ka minit ba 90+2. Katba na ka bynta ka Laitkor la ioh ban thep da u Banshemphang Kurbah ha ka minit ba 36 bad shi kol na u Isharwell Mukhim ha ka minit ba 49.
Ka Laitkor kaba don mynta ha ka Kyrdan ba 7 jong kane ka lympung mynta ka samoi, kan bteng ia ka jingiakhun pyrshah ia ka Malki SC ha ka 11 Nailur 2025 bad ka Nongrim kan ïakhun pyrshah ia ka Malki SC ha ka 12 Nailur 2025.
