Jowai: Ka jingïalehkai Badminton kaba la tip kum ka Open To All Master (Veteran) kaba la pynlong ha ka 12 bad ka 13 tarik Nailur, 2025 ha Seiñraij Indoor Hall kala poi noh sha kaba kut hapdeng ka jingitynnad bad ka jingshongshit ha ka jingïalehkai.
Ïa kane ka Open To All Master (Veteran) la pynlong da ka West Jaiñtia District Badminton Association ha ryngkat ka jingïatreilang bad ka ophis u District Sports Officer, West Jaiñtia Hills.
Ki kyrdan jong ki jingïalehkai ki kynthup ïa ka 75+ Minimum Age-35, 85+ Minimum Age-40, 95+ Minimum Age-45 bad ka 105+ Minimum Age-50.
Ïa ka nam Champion haka jingïakop jong ka kyrdan 105+ Minimum Age-50 la ïoh da u Gyan Ranjan Borah bad u Bastab Neog damn kiba la pynliem ïa u Pynbiang Laloo bad u Goldenstar Kharbuli da 21-14 & 21-18.
Ha ka kyrdan 95+ Minimum Age-45 la jop da u Gyan Ranjan Borah bad u Bastab Neog da kaba pynliem ïa u Rimilan Passah bad u Goldenstar Kharbuli da 13-21 & 22-24. Ha ka kyrdan 85+ Minimum Age-40 ïa ka nam jop la ïoh da u Da-u-ru Laloo bad u Rimilan Passah kiba la pynliem ïa u Siddhartha Das bad u Aiborlang Ranee da 21-17, 25-23. Katba ha ka kyrdan 75+ Minimum Age-35 ïa ka nam jop la ïoh da u Da-u-ru Laloo bad u Yutang Kma kiba la pynliem ïa u Dr. Peterson Lamare bad u Daymeniv Shullai.
Hashwa ban pynkut ïa kane ka lympung Open To All Master (Veteran)-2025 na ka liang u ma Khroobok Passah, District Sports Officer, West Jaiñtia Hills lem bad ki dkhot ka West Jaiñtia District Badminton Association (WJDBA) naduh u ma J.M. Pohsngap bad u ma D. Pyrbot, President, WJDBA kila sam ïa ki khusnam (Certificate) ha ryngkat ka song pisa sha baroh ki nongjop kiba la poi sha ka jingïakhun Final.
