Ka jingïalehkai phubol bala pynïaid da ka West Jaiñtia District Sports Association (WJDSA) kaba la long mynta ka sngi 19 tarik u Nailur haka kyrdan ‘8th Debo Shullai Memorial Trophy 2nd Division Football 2025 bala pynlong ha madan Kiang Nangbah Stadium Dongmihsngi, Jowai.
Haba phai sha ka jingïakhun ba nyngkong ka Iawmulong Nartiang kala pynliem da 11-2 kol ïaka Caroline Colony, ïa ki kol na ka Iawmulong Nartiang la thep da u Mechanki Synnah saw kol ha ka minit ba 18, 28, 38 & 66, u Shemphang Phalangki hynriew kol haka minit ba 20, 40, 44, 53, 61 & 74 bad u Lonely Nongtdeh haka minit ba 78. Ïa ki ar kol na ka Caroline Colony la thep da u Teibormi Shadap haka minit ba 51 bad u Franlene Edify Lyngdoh haka minit ba 77.
Haka jingïakhun kaba ar ka hapdeng ka Lumbhahdakha Wahiajer bad ka Khliehmyntang Ialong kila poi sha ka jingïakhaid khlem da don kiba ïoh ban thep kol.
Katba haka jingïakhun kaba lai la hap ban pynsangeh noh ïa ka jingïakhun na ka daw ka jinghap u slap hapdeng ka Chilliangraij bad ka Luti tuber Ialong.
