Ka jingïalehkai phubol bala pynïaid daka West Jaiñtia District Sports Association (WJDSA) kaba la long mynta ka sngi 20 tarik u Nailur haki ar tylli ki kyrdan kata ka ‘5th Adelbert Memorial Trophy 3rd Division Football 2025 bad ka ‘8th Debo Shullai Memorial Trophy 2nd Division Football 2025 bala pynlong ha madan Kiang Nangbah Stadium Dongmihsngi, Jowai.
Haba phai sha ka jingïakhun ba nyngkong haka kyrdan 3rd Division ka Nonglatem kala pynliem da 2-1 kol ïaka Da-i-hi Mynsngat, ïa ki kol naka Nonglatem la thep da u Healthiest Lamare haka minit ba 29 bad u Pyndap Muktieh haka minit ba 35. Ïa ka shikol na ka Da-i-hi Mynsngat la thep da u Pynskem Mukhim haka minit ba 38.
Haka jingïakhun kaba ar ka Lumkhangdong Kyndongtuber kala pynliem da 3-1 kol ïaka Youth Welfare Iooksi SC ïa ki kol na ka Lumkhangdong Kyndongtuber la thep da u Pynshaiburom Phawa haka minit ba 5, u Hailan Shylla haka minit ba 64 bad u Medawan Phawa haka minit ba 74. Ïa ka shikol na ka Youth Welfare Iooksi SC la thep da u Wompher Tangliang haka minit ba 70.
Da kane ka jingjop kine ki ar kynhun ka Nonglatem bad ka Lumkhangdong Kyndongtuber kila ïoh ban rung sha ka Semi Final jong kane ka lympung.
Katba haka jingïakhun jong ka 2nd Division ka Giovento Mynso kala pynliem da 2-1 kol ïaka Shangpung Khliehmuchut, ïa ki ar kol na ka Giovento Mynso la thep da u Lighting Syntem haka minit ba 22 & 80+3. Ïa ka shikol na ka Shangpung Khliehmuchut la thep da u Samedahun Papang haka minit ba 70.
