Ka Klob Rajasthan United FC ka la pyndep ban soi pura ia u Samla Batskhemlang Thangkhiew na ka bynta ban iakhun ha ki lympung bapher bapher hapoh India kynthup ia ka Lympung I-League 2025-26.
U Samla Batskhem u dei uba la san na ka shlem hikai phutbol kaba na kane ka jylla, ka klob Wahingdoh. Lyngba ka jingtbit jong u, ka Rangdajied ka la soi ia une u snar ialehkai bad tang hadien khyndiat samoi u la iasoh bad ka klob Shillong Lajong.
Lyngba kane ka jingiasoh bad kane ka klob kaba na Rajasthan, u Thangkhiew u don ka jingkyrmen ban ioh iakhun pyrshah ia ka klob barim jong u, ka Shillong Lajong ha ka Lympung I-League mynta ka samoi namar baroh 2 tylli kine ki klob ki dei kiba don ha kane ka lympung mynta ka aiom 2025-26.
Hadien ba la ioh ban soi bad kane ka kynhun u Batskhemlang u la ong “Nga sngewkmen shibun ia kane ka jingsoi ba thymmai jong nga. Ha kane ka aiom ba thymmai, nga khmih lynti ba ngan kham trei shitom shuh shuh ryngkat bad ka kynhun da kaba iai pynbha bad ai ia kaba bha tam ha madan ialehkai”.
