Ka klob Shillong Lajong FC ka la ioh ban rah ia ka nam lahduh jong ka Lympung SSA Super Cup 2025 kaba dei ruh ka sien ba nyngkong ba ka Shillong Sports Association (SSA) ka la pynlong ia kane ka lympung ha ka Jylla ia kaba la pynlong ha Madan SSA Stadium Polo, Shillong.
Ka jingioh burom jong ka Lajong ha kane ka sngi (final) ka dei hadien ba la pynliem noh ia ka Rangdajied United FC da 3-1 kol. Ia kitei ki 3 kol na ka bynta ka Lajong la ioh ban thep da u Wilbert Marbaniang (55 & 72), bad shi kol na u Iohborlang L. Lyngkhoi lyngba ka penalty (45+2). Katba ia ka shi kol na ka bynta ka Rangdajied la ioh ban thep da u Denelson Pyngrope (25).
Ha kane ka sngi ba pynkut ia ka jingiakhun, la wan ban don ryngkat da u Myntri Rangbah ka Jylla, u Conrad K. Sangma, Bah Wailadmiki Shylla Myntri ba khmih ia ka Tnad Ialehkai ka Jylla, Bah Paul Lyngdoh (Adviser to the Chief Minister), Bah Banteidor Lyngdoh President jong ka SSA bad kiwei kiwei.
Ka SSA kaba la pynkut ia kane ka lympung da ka jingseisoh ka la pynpaw ia ka jingkmen namar ka jingdon ryngkat jong ka Sorkar Jylla hapoh ka jingialam jong u Myntri Rangbah Conrad Sangma, kumjuh ruh ia u President bad Secretary SSA, ia ka Tnad Ialehkai na ka bynta ban pynurlong ia kane Lympung.
