Ka West Jaiñtia Hills District Table Tennis Association (WJHDTTA) kaba ïatreilang bad ka Meghalaya Table Tennis Association, hynnin ka sngi 29 tarik u Nohprah kala pynhap pyrda ïaka Open-to-All & 1st Veteran Table Tennis Championship 2025 ha Khimusniang Indoor Sports Hall, Jowai.
Ïa kane ka Open-to-All & 1st Veteran Table Tennis Championship 2025, la pynlong da ka West Jaiñtia Hills District Table Tennis Association, la don ka jingïalang bala pynïaid da u President ka Association ma E. M. H. Passah, ha kaba u J. R. Chullai, Principal ka Q.C. Springside Higher Secondary School bad u nongïalehkai Table Tennis barim ka District ula long u kongsan.
Haba ai jingkren kum u kongsan ula ai mynsiem ïa baroh ki nongwan ïashim bynta ba kin don ïa ka akor ka burom, ka jingtrei shitom, ka mynsiem ïalehkai bad ban ïai pyntbit shuh shuh ha kane ka jait jingïalehkai.
La sam ruh ïa ki khusnam sha ki nongjop ha ki kyrdan bapher bapher haka Veteran 40+ Women Single la jop da ka Hakawothi Phai wan ba ar ka Shimti Nongbri, haka 40+ Men Single la jop da u G.L. Moan wan ba ar u Vikram Ryngkhlem, haka 40+ Men Doubles la jop da u Adelbert Passah & u Benedick Dkhar wan ba ar u Vikram Ryngkhlem & u Rishida Tariang, haka 50+ Men Single la jop da u Benedick Dkhar wan ba ar u Da-o-wan Nartiang, haka 50+Men Doubles la jop da u Benedick Dkhar & u Da-o-wan Nartiang wan ba ar u Aldrin Wahlang & u Moonlight Pariat.
Haka Open to all Men Team Event la jop da ka kynhun Team-B hapoh ka jingïalam u (Captain) Lammida-o Passah, wan ba ar ka kynhun Team-A (Captain) Eraphael Dkhar. Haka Women Team Event la jop da ka Team-B (Captain) ka Hakawothi Phai wan ba ar ka Team-A (Captain) ka Sakaniroi Tariang.
Ha kane ka sngi la pynkup burom kumjuh ïa ki nongïalehkai kiba mihkhmat ïa ka West Jaiñtia Hills District bad kiba ïalehkai bha haka 6th Meghalaya Games 2025, kaba la dep pynlong ha Jowai, kiba kynthup ïa ka Diva Tang kaba ïoh Gold Medal – Singles, Gold Medal – Women’s Doubles & Gold Medal – Mixed Doubles, ka Meba-aihun Swer haka Gold Medal – Women’s Doubles & Bronze Medal – Singles. U Eraphael Dkhar haka Gold Medal – Mixed Doubles.
La pynkut ïa kane ka jingïalang da ki kyntien ai khiblei na u ma Aldrin Wahlang, General Secretary ka Association, uba la ai khublei naduh u kongsan, ki nongkitkam ka Association, ki nongïalehkai, ki officials, khamtam ïa ka Dorbar Shnong Khimusniang bad baroh kiba don bynta ban pynlong ïa kane ka lympung kaba jop.
