Ka PCC Phramer kala jop da 14 run ïa ka Chutwakhu SC haka jingïalehkai mynta ka sngi 27-02-2026 haka jingïakhun jong ka District Cricket League 2026 bala pynïaid da ka West Jaiñtia Hills District Cricket Association.
Ïa ka kynting pisa la jop da ka PCC Phramer kaba la jied ban tied nyngkong bad ka la kamai 168 run bad la hap lut baroh ki Wicket ha ki 26.3 over. Na ki nongtied jong ka, saw ngut ki la ïoh 0 run bad saw ngut ki la tied ar dak kata u Pyrkhat Sari (C) u la lehkai bha da kaba kamai 81 run na ki 69 bol kynthup kawei ka 6 bad 11 tylli ki 4. U Kamni Suna ula kamai 21 run na ki 28 bol kynthup ar tylli ki 4 run bad U Ram Ksoo pat u la kamai 18 run na ki 17 bol kynthup ïa 3 tylli ki 4 run. Na ki nongkawang bol jong ka Chutwakhu SC, u Kunemiki Lato ula kawang bol bha bad ïoh khur haduh 5 wickets bad kawei ka maiden over na ki 6.3 over.
Haba wan ban beh ïaka thong, ka Chutwakhu SC kala kamai 154 runs bad la hap lut baroh ki wickets haki 29 over bad kumta ka la duna 14 run ban jop. Napdeng ki nongtied jong ka don tang ar ngut kiba leh bha, u Sam Nesta Chyrmang u ba tied 40 run na ki 41 bol kynthup 7 tylli ki 4 run bad u Heisa Bareh uba tied 32 run khlem out na ki 35 bol kynthup 5 tylli ki 4 run. Na ki nongkawang bol jong ka PCC Phramer u Pyrkhat Sari (C), u Deimiki Rabon bad u Ram Ksoo ki la ïoh ban khur mar 2 wickets.
Ïaka nam Man of the Match la ïoh rah da u Ram Ksoo u nongïalehkai ka PCC Phramer uba ïalehkai bha ha baroh ki liang naduh ka jingap fielding, ka jingkawang bol bad ha kaba tied.
La pyntip ka jingïalehkai haka 28 tarik kan long hapdeng ka Khimusniang CC pyrshah ïaka Dulong CC haka por 9 baje mynstep.
