Ka kynhun ïalehkai Cricket jong ka Wahiajer S.C kala jop suk da 8 wickets pyrshah ïa ka Mowkaiaw C.Y.C, haka jingïakhun jong ka District Cricket League 2026 mynta ka sngi 5 tarik u Lber bala pynïaid da ka West Jaiñtia Hills District Cricket Association ha madan Khliehtyrshi, Jowai.
Ha kane ka jingïakhun, ka Mowkaiaw C.Y.C kala jop ïa ka toss bad kala jied ban tied nyngkong. Hynrei ka kynhun kala lah ban kamai tang 106 ron bad shah pynhap baroh ki 10 wickets ha ki 25 overs. U Damewanchwa u la tied 21 ron katba u Eleazer C Dkhar ula kamai 17 ron.Na bynta ki nongkawang bol jong ka Wahiajer S.C, u Damewan Lhuid ula lehkai bha da kaba shim 3 wickets bad ai tang 21 ron ha ki 6 overs. U Heimon Dkhar, u Mebanker Suting bad u George Ryngkhlem ki la shim mar 2 wickets.
Ha ka pali ba ar, ka Wahiajer S.C kala beh ïa ka thong da kaba kamai 109 ron bad shah pynhap tang 2 wickets ha ki 17.3 overs. U Jeremaia Mukhim ula tied 32 ron bad u Heimon Dkhar u la tied 29 ron khlem shah pynhap. U George Ryngkhlem ruh u la noh synñiang da kaba tied 23 ron khlem shah pynhap tang na ki 13 bol.
Ïa ka nam Man of the Match la ïoh rah da u Heimon Dkhar, u Captain jong ka Wahiajer SC.
Ka jingïalehkai lashai ka sngi, 06-03-2026 kan long hapdeng West Jaiñtia Police pyrshah ïa ka Shangpung SC ha ka por 9 baje mynstep.
