Ka kynhun ïalehkai jong ka Twah-u-sdiah United kala long syndon ka lahduh haka lympung ïalehkai jong ka “First War Jaiñtia Junior Football Championship Under-16 Pamtbuh 2025” bala pynïaid da ka Sports and Youth Sub Committee ka War Jaiñtia Students’ Union (WjSU) kaba la long mynta ka sngi Thohdieng 6 tarik u Lber, 2026 ha madan phutbol ka Pamtbuh, Amlarem Civil Sub-Division.
Ha kane ka sngi la wan ban donlang da u ma K. Passah uba dei District Sport Office, West (DSO) Jaiñtia Hills District Jowai kum u kongsan, haka jingdonlang u bah Bankit Pakyntein COA ka Langsning FC, Shillong, bah Chirup Pamthied Former General Secretary ka ASSA bad uba long ruh Principal Adventist Higher Secondary School Khliehtyrshi West Jaiñtia Hills, ma Dapmon Tariang General Secretary ASSA, u ma Everest Langstang General Secretary ka WjSU, u Waheh Shnong ma L. Bareh bad ki riewieit phutbol ka thaiñ kiba la wan bam pynshong shit ïa ka jingïalehkai.
Ka jingïalehkai Final kala long hapdeng ka Raising Star FC Mosakhia pyrshah ïa ka Twah-u-sdiah United bad haka jingïakhun jong ka kylla step ka Twah-u-sdiah United kala ïoh ba thep 2 kol kata haka minit ba 23 da u Nambor Lamat bad haka minit ba 30 da u Jerri Mesi Pohdweng.
Katba ha ka jingïakhun jong ka kylla miet baroh ar kim shem la ïoh shuh ban pynkhi jar bad haduh kaba kut jong ka por, ka Twah-u-sdiah United kala long ka lahduh jong kane ka lympung mynta u snem da kaba jop 2-0 kol.
La pyntip ka jingpynlong ïa kane ka jingïalehkai phutbol Under-16 daka WJSU ka long kum shi bynta ban kyntiew ïa ka football hapoh ka thaiñ War Jaiñtia. La pyntip ruh ha manla ki match jong kane ka Tournament ka Sports & Youths Sub Committee ka la peit pyrman ïa ki nongïalehkai kiba don shisha ka sap ka phong bad ha kane ka sngi pynhap pyrda yn pynbna ïa ka kyrteng jong ki bad hadien yn phah pyntbit ïa ki ba kin jam sha uwei pat u pud jong ka jingïalehkai football ha ka jingim jong ki ban wanrah ka nam ka burom ïala ka shnong ka thaw bad ka thaiñ hi baroh kawei.
Ïa ki khusnam sha ki nongjop la sam da u kongsan ha ryngkat ki nongshah khot sngewbha, ka kynhun lahduh kala ïoh rong 60,000/- hajar tyngka ha ryngkat ka Trophy, katba ka kynhun ba wan ba ar kala ïoh 40,000/- hajar tyngka lem bad ka trophy. Ïaka nam Best Gold Keeper la ïoh da u Salanki Nyalang, ïa ka nam Player of the Tournament la ïoh da u Nambor Lamay twah, Top Scorer la ïoh da u Jerri Messi Pohdweng baroh lai ki dei na ka kynhun Twah-u-sdiah United bad ïa ka nam Discipline Team la ïoh da ka kynhun Amsarin SC.
Na ka liang ki nongkren baroh ha kane ka sngi kila kitbok ïa baroh ar tylli ki kynhun kiba la poi sha ka jingïakhun phainal jong kane ka lympung, ha ka juh ka por la kyntu ïa kitei ki nongïalehkai ba kin long kiba minot bad trei shitom ha ki jingïalehkai na ka bynta ka lawei jong ki.
