Ka kynhun West Jaintia Police ka la pynliem ïa ka Shangpung S.C da 102 runs ha ka jingïalehkai jong ka WJHDCA District Cricket League 2026 kaba la long ha madan khliehtyrchi, Jowai.
Hadien ba jop ïa ka toss, ka West Jaintia Police ka la jied ban tied nyngkong bad ka la lah ban kamai 215 runs bad hap 9 wickets ha ki 35 overs. Ha ka jingïalehkai tied, u Obadaia Bareh u la long u nongtied uba paw bha da kaba kamai 39 runs na ki 47 bol kynthup 5 tylli ki 4 Run, bad u Bishal M Sangma u la pynbud da 27 runs na ki 17 bol kynthup 2 tylli ki 6 run bad 2 tylli ki 4 run. Na ki nongkawang bol jong ka Shangpung SC, u Rishot I Suchiang u la ioh ban pynhap 3 wicket na ki 7 over, katba u Hameki Susngi bad u Bantei Langstang ki la ioh ban pynhap mar 2 wicket..
Haba wan ban beh ïa ka thong kaba 216 runs, ka Shangpung S.C kam shym la lah ban ïakhun bha bad ka lah ban kamai tang 113 runs bad hap lut baroh ki wicket ha ki 23.5 overs. U Bantei Langstang u la long u nongtied uba kamai bun eh na ka bynta ka kynhun da 33 runs khlem shah pynhap, hynrei kam shym la biang ban ïarap ïa ka kynhun ban poi sha ka thong.
Ha ka liang ka bowling jong ka kynhun West Jaintia Police, u Kenny Wann u la long uba kongsan eh da kaba shim 3 wickets na 5.5 overs, katba u Plielad Makri u la ioh ban pynhaap 2 wicket
Ia ka nam Man of the Match la ioh rah da u Loverist Langbang jong West Jaintia Police. Ka jingialehkai mynta ka sngi ka 07 tarik kan long hapdeng Ummulong B bad ka Young Lads CC ha ka por 9 baje mynstep.
