Ka kynhun ïalehkai Cricket jong ka Young Lad CC kala jop da 76 run pyrshah ïa ka Ummulong-B, haka jingïakhun jong ka District Cricket League 2026 mynta ka sngi 7 tarik u Lber bala pynïaid daka West Jaiñtia Hills District Cricket Association ha madan Khliehtyrshi, Jowai.
Ha ka jingïalehkai, ka Young Lads CC kaba la jop ïa ka toss ka la jied ban tied nyngkong bad ka la kamai 173 run bad duh baroh ki wicket ha ki 34.5 over. Ki nongtied kiba la leh bha ki kynthup ïa Riata Challam uba la kamai 24 run bad Namewanki Pakyntein 21 run.
Na ka liang ki nongkawang bol jong ka Ummulong-B, u Kermiki Bamon bad u Cleofast Bamon ki la khur mar 3 wicket marwei, kaba la ïarap ban khanglad ïa ka Young Lads C.C ban kynjoh sha ka run kaba kham heh.
Haba wan ban beh ïa ka thong ka ba 174 ron, ka Ummulong-B kam shym la lah ban ïalehkai bha haka jingtied bad kala shah pynhap lut tang 97 run ha ki 20.3 over. U Johneshwa Passah u la long u nongtied uba la kamai bun da 25 ron hynrei kata kam shym la biang ban pynjop ïa ka kynhun.
Na ka liang ki nongkawang bol jong ka Young Lads CC, u Maremdorkini Sutnga bad u Waibhami Ryngkhlem kila khur mar 3 wicket marwei, katba u Saunihi Patwet ula khur 2 wicket.
Ïa ka nam Man of the Match la ïoh rah da u Maremdorkini Sutnga, u nongïalehkai jong ka Young Lads CC.
La pyntip haka sngi nyngkong, 09-03-2026 kin don ar tylli ki jingïalehkai, kawei ka long hapdeng ka Goodwill Mupliang bad ka Chutwakhu SC ha madan Khliehtyrchi haka por 9 baje mynstep. Kawei pat ka long hapdeng ka Ummulong SC bad ka Dulong CC ha madan Wahiajer haka por 9 baje mynstep.