Ka kynhun ïalehkai jong ka Ummulong S.C bad ka Goodwill Mupliang S.C ki la long ki nongjop mynta ka sngi 9 tarik u Lber, 2026 ha ki ar tylli ki jingïalehkai jong ka District Cricket League 2026 bala pynïaid daka West Jaiñtia Hills District Cricket Association.
Haka jingïalehkai Cricket bala pynlong ha Wahiajer Mini Stadium, ka kynhun Ummulong S.C kala jop da 5 wicket ïa ka Dulong CC.
Hadien ba ka Dulong C.C ka jop ïa ka toss, ki la jied ban tied nyngkong bad ki la kamai 143 runs bad shah pynhap lut baroh ki wickets haki 28.5 overs. U Marchan Lyngdoh ula long u nongtied uba seisoh tam da kaba tied 51 runs na 52 balls kynthup 8 fours bad 1 six.
Ha ka bowling jong ka Ummulong SC, u Heimon Lyngdoh ula long uba seisoh tam da kaba shim 3 wickets, katba u Sylvester Mylliempdah bad u M Nelson Lamare kila shim mar 2 wickets.
Haba beh ïa ka thong, ka Ummulong S.C kala tied bha bad kala poi sha ka jingjop da kaba kamai 144 runs na ki 20.4 overs bad shah pynhap tang 5 wickets, u M Nelson Lamare ula tied stet bha da kaba kamai 32 runs naki 20 bol, u Sylvester Mylliempdah ula kamai 23 run na ki 29 bol katba u Rejoice Gassah ula sah khlem shah pynhap da 22 runs ban pynskhem ïa ka jingjop. Na ki nongkawang bol jong ka Dulong CC, u Marshal Pariat u la ïoh ban pynhap 2 wicket na ki 5 over.
Ïa ka nam Man of the Match la ïoh rah da u Heimonlang Lyngdoh jong ka Ummulong SC, uba ïoh ban pynhap bun wicket.
Ha kawei pat ka jingïalehkai ha madan Khliehtyrchi Mini Stadium, ka kynhun Goodwill Mupliang S.C kala jop da 5 wicket ïa ka Chutwakhu SC.
Ha kane ka jingïalehkai, ka kynhun Chutwakhu S.C ka la jop ïa ka toss bad ka la rai ban tied nyngkong. Hynrei ki nongtied jong ka kynhun kim shym la lah ban pynkiew bun run bad ka kynhun kala shah pynhap lut ha ka score kaba 112 run ha 25.1 over. U Stellify N Sten ula long uba tied bha da kaba kamai 34 run, katba u Kunemi Lato ula kamai 28 run. Na ki nongkawang bol jong ka Goodwill Mupliang S.C, u Echwa Phawa, u Richest Star Dhar bad u Defender Dhar kila khur mar 2 wicket.
Haba wan beh ïa ka thong, ka Goodwill Mupliang SC kala lah ban kynjoh ïa ka thong da kaba kamai 115 run ha ki 16.1 over bad jop da 5 wicket. U Byforcestar Dhar ula pyni ïa ka jingtbit kaba khraw ha kaba tied da kaba kamai 75 run khlem shah pynhap na ki 54 bol. Na ka liang ki nongkawang bol ka Chutwakhu S.C, u Heisa Bareh ula leh bha da kaba khur 3 wicket, hynrei kata kam pat biang ban pynjop ïa ka kynhun.
Ïa ka nam Man of the Match la ïoh rah da u Byforcestar Dhar, uba kamai bun run na ka Goodwill Mupliang SC.
La pyntip Ki jingialehkai la shai ka sngi ka 10 tarik kin long hapdeng ka Shangpung CC pyrshah ïa ka War Jaiñtia United ha Khliehtyrchi Mini Stadium, katba ka Lion S&YA pyrshah ïa ka Ummulong-B ha Wahiajer Mini Stadium ha ka por 9 baje mynstep.
