Ka Khliehtyrchi SC bad ka Goodwill Mupliang SC kila long ki nongjop ha ka jingïalehkai jong ka District Cricket League 2026 kaba la long mynta ka sngi 14 tarik u Lber 2026, bala pynïaid da ka West Jaiñtia Hills District Cricket Association ba la pynlong ha ki ar tylli ki jaka.
Ha ka jingïalehkai ba la long ha Khliehtyrchi Mini Stadium, ka Khliehtyrchi SC kala jop da 119 run ïa ka Moodymmai SU.
Ka Moodymmai SU ka la jop ïa ka jingïakawang pisa bad ka la jied ban kawang bol nyngkong. Ka Khliehtyrchi SC haba tied nyngkong kala kamai 250 run na ki 35 over bad ka la duh 7 wicket. Na ki nongtied jong ka u H. Timi Ryngkhlem – 88 run na 85 bol (5 six, 4 four) bad u Yoomi Patwet – 61 run na 52 bol (10 four). Na ki nongkawang bol ka Moodymmai SU, u Kyntumiki Slong, Nehlang Pariat bad Rijest Lytan kila ïoh khur mar 2 wicket.
Haba beh ïa ka thong, ka Moodymmai SU kala kamai tang 131 run bad ka la duh baroh ki wicket ha 22.1 over. Ki nongtied ba kongsan, u Kyntumiki Slong – 27 run na 14 bol, u Bishar Lamare – 25 run na 18 bol, katba u Rijest Lytan – 24 run na 15 bol. Na ka liang ki nongkawang bol ka Khliehtyrchi SC, u Peter Nongtdu – 4 wicket na 7 over, katba u H Timi Ryngkhlem bad Khimti Dkhar kila khur mar 2 wicket.
Ïa ka nam Man of the Match la ïoh rah da H Timi Ryngkhlem jong ka Khliehtyrchi SC.
Ha kawei pat ka jingïalehkai kaba la long ha Wahiajer Mini Stadium, ka Goodwill Mupliang SC ka la jop da 8 wicket ïa ka Riwar Titan CC.
Ka Riwar Titan CC kala jop ïa ka jingïakawang pisa bad ka la jied ban tied nyngkong. Ka la kamai 210 run na 35 over bad ka la duh 6 wicket. Na ki nongtied jong ka, u Mickey Marngar – 84 run na 81 bol (4 six, 9 four), katba u Pusonbha Rymbui – 72 run na 82 bol (2 six, 7 four). Na ki nongkawang bol ka Goodwill Mupliang SC, u Greatestful Lyngkhoi bad Echwa Phawa kila khur mar 2 wicket.
Haba beh ïa ka thong, ka Goodwill Mupliang SC ka la jop suk da kaba kamai 214 run na 26.1 over bad duh tang 2 wicket. Na ki nongtied jong ka, u Byforcestar Dhar – 110 run na 81 bol (8 six, 10 four), katba u Oniwanker Sna – 65 run na 62 bol (3 six, 8 four) Na ki nong kawang bol jong ka Riwar Titan CC, u Pynkhraw Khonglah bad Habanjop Khonglah kila khur mar 1 wicket.
Ïa ka nam Man of the Match la ïoh rah da Byforcestar Dhar jong ka Goodwill Mupliang SC namar ka jingïalehkai bha ha ka tied.
Ki jingïalehkai ha ka 16 tarik u Lber 2026 (Monday) kin long ka Ummulong SC pyrshah ïa Mowkaiaw CYC ha Khliehtyrchi Mini Stadium, katba ka The Legend (Lissi Pearl) pyrshah ïa West Jaiñtia Police CC ha Wahiajer Mini Stadium ha ka por 9 baje mynstep.
