Ka Khasi Students’ Union (KSU) South West Border Circle ka pynpaw ïa ka jingsngewkhia kaba jur halor ka jingïakynad hapdeng ki nongshong shnong ka thaiñ halor ka jingïakajia ïa ki jingkam trai jong ki. Kane ka jingjia ka long kaba sngewsih bad ka buh jingma ïa ka shongsuk shongsaiñ, ka jingïatylli bad ka jingïalong jingïajan hapdeng ki paidbah.
Kat kum ki khubor ba la sakhi dang shen, la don ka jingïaid peace rally da ki nongshong shnong ban pyrshang ban wanrah ïa ka jingïasuk bad ia ka jingbishar ba hok na ka Jaintia Hills Autonomous District Council. Hynrei watla kata, ka seng ka ioh jingtip ba ka jingïakynad ka dang iai don bad ka jingma ka dang jur lada ym shimkhia mardor.
Shuh shuh, katkum ka jingtip ba ka seng ka la ïoh ba ka jingïakynad hapdeng ki nong shong shnong kane ka thaiñ ka la nang jur bad ka don ruh ka jingma kaba khraw lada ym shimkhia mardor. Kane ka pyni shai ba ka jingïakajia kam dei shuh tang ka jingïapher jingmut hynrei ka la poi sha ka jingïatyngkhuh kaba lah ban wanrah jingmynsaw bad wat jingïap lane duh ei ki mynsiem briew ruh.
Ka KSU South West Border Circle ka kwah ban pynshai ba kam don jingthmu satia ban tuklar ia kane ka kam, hynrei ka sngew ba kum kine ki jingïakajia kim dei ban nang jur shuh shuh hapdeng ki para doh para snam, namar ka jingïatylli jong ki paidbah ka dei ban long kaba kongsan tam.
Hadien ba ngi la ioh i ia ka jingtur jong ki nongshong shnong na ka Shnong Huroi bad Lahaleiñ sha ophis ka District Council, bad ruh halor ka jingiai kuman jong ka Council ban pynbeit ïa katei ka jingeh, na ka liang ka seng ka pynpaw ïa ka jingsngewkhia kaba jur.
“Ngi sheptieng ba lada ym shimkhia mardor, kan lah ban wanrah ïa ka jingjia kaba sngewsih hapdeng ki para doh para snam. Kumta, ngi maham jur ba ym dei ban ailad ïa kano kano ka jingïakynad ban nang jur, namar kan lah ban poi wat sha ka jingïap lane duh ei ki mynsiem ha katei ka thaiñ”.
Kumjuh ruh, ka KSU ka kyntu ïa baroh ki shnong kiba don bynta ba kin ïai bteng ban long jai jai, ban kiar na kino kino ki kam kiba lah ban pynjur shuh shuh ïa kane ka jingïakynad, bad ban ai jingïatreilang bad ki bor synshar ban pynbeit ïa kane ka kam da ka jingïasuk.
Ha kajuh ka por, ka KSU ka dawa tyngeh ïa ka District Council ba kan shimkhia mardor ban pynbeit ïa kane ka jingeh khlem da pynslem shuh. Ka District Council, kaba hap hapoh ka Sixth Schedule jong ka Riti synshar ka Indian Constitution, ka dei kaba la pynkup bor ban peit ïa ka synshar khadar ha ki thaiñ riewlum, khamtam eh ha kaba ïadei bad ka synshar shnong, ki rukom im tynrai bad ki kam shnong jong ki trai ri trai muluk.
Namar kata, ngi buh ka jingshaniah ha ka Council ba kan leh eiei mardor, da ka jingbishar hok bad ka jingïalam kaba dei, ban wanrah biang ïa ka jingïasuk bad jingïasngewthuh jingmut hapdeng ki shnong kiba don bynta. Ka Council ka dei ban pyndep ïa la ka kamram ban ïada ïa ka jingïatylli, ka bha ka miat bad ka hok jong ki paidbah.
Lym kumta, ka seng kam nym hun tang ban shu peit kai, hynrei kan shim da ki sienjam kiba tyngeh pyrshah ïa ka District Council lada kam lah ban pynbeit ïa kane ka kam ha ka por kaba biang, ka KSU ka maham tyngeh ruh ba lada jia ei ei ka jing jia ba sngewsih ia ki para doh para snam jong ngi, ka district council bad ka EC ba ialam mynta ka dei bah khlieh, namar ia ka bor ba la ai ha ki ADC ka dei beit ka hok jong ki Paidbah ban pyntyllun ia ka synshar Khadar kat kum Riti synshar jong ngi ki riewlum.
Ka KSU ka pynkynmaw ruh ba ngim kwah ban ïohi ïa ki briew jong ngi ba kin ïakajia para ma ki, hynrei ka jingïatylli bad jingïalong jingïajan ka dei ban long kaba hakhmat eh, bad ngi maham ruh ia ka District Council ba kam dei ban shahliang lane ban pyndem ha khmat jingno jongno ne ban leh politics ki khwan myntoi ba don ha ka bor hynrei dei ban ai ka jingshakri hok katkum ka Riti synshar bad kat kum ka JAINTIA HILLS AUTONOMOUS DISTRICT (ESTABLISHMENT OF ELAKA AND VILLAGE AND ELECTION, APPOINTMENT, POWERS, FUNCTIONS AND JURISDICTION OF DOLLOI SIRDAR AND WAHEH SHNONG) ACT, 2015, bad kum ba la mang ia ka District Council kyrpang ha ka synshar khadar ia ngi riewlum kumta dei ban Burom bad ban bud ym ban leh politics ha ka synshar khadar, lym kumta ka seng kan sa mih madan pyrshah ia ka ki khwan myntoi bad ki bor ba halor ki pyn tyllun ia ka kam jong ka council tang kum ka jaka leh politics lane ban pharia ia ka shong suk shong sain ki para doh para snam.