U Symbud Myntri Rangbah ka sorkar jylla uba dei ruh u MLA ka 1-Nartiang Constituency u ma Sniawbhalang Dhar mynta ka sngi 18 tarik u ïaïong, 2026 ula wan ban plie paidbah ïa ka madan ïalehkai phutbol jong ka shnong Sohphoh, West Jaiñtia Hills District.
Na ka liang u ma Dhar ula ai jingïarap haduh 15 lak tyngka ban pynshan ïa katei ka madan phutbol ka shnong lyngba ka skim Special Rural Work Programme 2024-25 bad 2025-26, katba na ka liang u MDC ka thaiñ (Moodymmai Nongkhroh Constituency) u ma Jesse Suiam ula ïarap ïa katei ka madan 4 lak tyngka lyngba ka SAG-2019-2020.
Ïa ka jingïalang hashwa ban plie ïa u mawnongrim la pynlong ha katei ka madan bala pynïaid da u Waheh Shnong ma Mutchwa Thabah, haka jingdonlang u BDO ka Thadlasleiñ, ki riew rangbah ka thaiñ, ki MDC ka JHADC, ki nongshong shnong nalor ki khynnah skul bad ki nonghikai.
Na ka liang ka shnong kala pynpaw ka jingsngewnguh ïa u MLA ma Sniawbhalang Dhar uba la kloi ban ïarap ïa katei ka pisa ban pynshna ïa ka madah phutbol ka shnong kaba ïa ryngkat kyrdan katkum ka jingheh (standard) ban ïalehkai phutbol.
La pynkynmaw ruh mynta ka kynti ka kynhun ïalehkai jong ka shnong kaba la tip kum ka Lumphyrnai Cultural & Sports Club Sohphoh kala dei ka kynhun ba nyngkong jong ka Thadlaskeiñ Sports Association (TSA), kaba la ïoh rung ban ïakhun haka lympung Meghalaya State League (MSA).
U ma Sniawbhalang haba ai jingkren ula ai ka jingïaroh ïa kane ka kynhun jong ka shnong Sohphoh kaba la kiew shaphrang haka kam ïalehkai phutbol bad ïoh rung syndon sha kane ka lympung MSL, ula kyntu ïa ka shnong ban don ka jingïatylli ha baroh ki liang bad kum ki nongshnong shnong ki hap ban pyndep ïa ka jingpynrung kyrteng Aadhaar Number bad ïa kiwei de na ka bynta ki jingmyntoi ba bun na ka sorkar bad kim dei ban sheptieng ïa kino kino ki khubor hamsaïa.
Ula ong ‘ka jingbishni pihuiñ para ma ngi’ ka long ka jingduhnong kaba khraw eh ha ka jingim kum ki briew bad kaba kordor dei ban don ka jingïaishah ha ka jingim bad ka jingïatylli lang ha baroh ki liang.
Ha kane ka sngi ka RCLP School Sohphoh kala aiti ruh ïa ka Memorandum ha u Synbud Myntri Rangbah ban pynshna ïaka building jong ka skul.
