Ka KSU South West Border Circle ka pynpaw ïa ka jingsngewkhia kaba jur halor ka jingkylla rong biang jong ka wah Wah-Prang ha kine ki khyndiat sngi bad kaba ju iai jia man ka por, khamtam ha ka por slap. La sakhi ba kane ka jingkylla rong ka ju jia ha man la ka por ba wan u slap, kaba kdew ba lah ban don ka jingjaboh ne ka jingpyllait jaboh sha kane ka wah.
Kane ka jinglong ka wanrah jingma kaba jur ïa ki jingim ba im ha kane ka wah bad haduh ba ki dohkha ba im ha kane ka wah bun ki ba la iap na kane ka jingkylla rong kynsan kane ka wah. Nangta ruh, ka koit ka khiah jong ki paidbah ka don ha ka jingma, namar bun ki briew ki pyndonkam ïa kane ka wah bad bam ïa ki dohkha na kane ka wah. Ka jingbam ïa ki dohkha na kane ka um kaba la jaboh ka lah ban wanrah ïa ki jingma ha ka koit ka khiah jong ki briew.
Ka KSU South West Border Circle ka dawa jur ïa ki bor ba dei peit, khamtam ïa ka Meghalaya State Pollution Control Board (MSPCB), ba kin leh mardor ïa ka jingtohkit kaba bniah halor kane ka jingjia kaba ju jia man ka por. “Dei ban lap ïa ka tynrai jong ka jingjaboh, bad ban shim ïa ki sienjam kiba tyngeh pyrshah ïa kiba donkti lada lap. Ngi dawa ruh ïa ka sorkar ba kan shim mardor ïa ki sienjam kiba donkam ban khanglad ïa ka jingjaboh jong kane ka wah bad ban pynphai biang ïa kane ka wah sha ka jinglong ba shngaiñ bad ba khuid, pynpaw ka Seng.
Ka KSU South West Border Circle kan bteng ban buddien ïa kane ka jingjia bad ban shim ïa ki sienjam kiba kham tyngeh lada ym shimkhia mardor da ki bor ba dei peit.
