Ka Jaiñtia Arm Wrestling Associations (JAWA) kala pdiang burom ïa ki nongïakhun kti napoh ka Ri-Lum Jaiñtia kila ïoh ban khur jingjop haka 4th PAFI National Arm Wrestling & PARA Arm Wrestling Championship 2026, hapoh ka jingpeit jong ka People’s Arm Wrestling Federation India bala pynïaid da ka Arm Wrestling Sports Association Gujarat haka la don haduh 2 hajar ngut kiba la wan ban ïashim bynta ha kane ka lympung.
Ïa kitei ki 7 ngut ki rang ïakhun kti napoh ka Ri-Lum Jaiñtia la pdiang burom da ka JAWA ha Thadlaskeiñ Mukhla High Winn, West Jaiñtia Hills District haka por 7 baje jamnmiet jong ka 6 tarik u Jylliew 2026.
Ha kaba la pynlong ïaka jingïalang pdiang burom ïa kitei ki nongjop Arm Wrestling ha ryngkat ka jingdonlong ki kmie ki kpa bad kiba ha ïing ha sem jong ki. Ïa ka prokram la pynïaid da ka Pretty Lyngdoh General Secretary JAWA, la ïoh ka jingkren na u Westerly Syngkon Waheh Shnong Lad Mukhla, na u Dr. Return Pohsnem, ka Sumita Ksiar Publicity Secretary Meghalaya Arm Wrestling Associations (MAWA) bad ki kyntien ai khublei na u Ebormi Ryngkhlem Asst. Publicity JAWA.
Na ka liang ka JAWA ka la pynpaw ka jingai khublei kyrpang ïa u myntri ka tnad ka koit ka khiah bad ka kam ïalehkai Sports jong ka sorkar jylla u ma Wailadmiki Shylla, kumjuh ïa ki Deputy Commissioner bad SP jong ka West & East Jaiñtia Hills District kiba la ïarap ban pynïaid shakhmat ïa kane ka jingpdiang burom.
Kum ka dak ban burom ïa kitei ki rang ïalehkai ki dkhot ka JAWA kila leit ban synran ïa kitei ki 7 ngut ki ki nongïakhun kti napoh ka Ri-Lum Jaiñtia naduh ka kilon ba don ka West Jaiñtia Hills bad leit buh ïa ki shala ki shnong jong ki.
Kine ki 7 ngut ki nongïakhun kti ka Ri-Lum Jaiñtia kiba la mih khmat ïaka Jaiñtia Arm Wrestling Association (JAWA), lyngba ka Meghalaya Arm Wrestling Association (MAWA) kiba la wanrah nam ïa ka jylla Meghalaya ki kynthup ïa u Alexander Lyngdoh na Namdong-A West Jaiñtia Hills ula ïoh 2 tylli ki takma Ksiar (Gold Medal) haka 80 Kg Senior HI Standing Men, u Shanborlang Siangshai na Umshangiar Khanduli West Jaiñtia haka 70 Kg Senior HI Standing Men ula khur 2 tylli ki takma Ksiar (Gold Medal), u Noveniusroiky Dkhar na Madankynsaw Mawkyndeng West Jaiñtia 2 tylli ki takma Rupa (Silver Medal) haka 65+ Kg HI Standing Junior Boys, ka Sinitylutmon Kympat Tluh East Jaiñtia kala ïoh 2 tylli ki takma Ksiar (Gold Medal) haka 70 Kg HI Standing Women, u Heipormi Talang na Samatan West Jaiñtia 1 takma Rnong (Bronze Medal) haka 50 Kg Junior Boys, ka Monica Syntem na Samatan West Jaiñtia 1 takma Rnong (Bronze Medal) haka 65 Kg Youth Girls bad ka Olivia Dkhar na Khahnar East Jaiñtia Hills kala ïoh 1 takma Ksiar, 1 takma Rupa (Gold & Silver Medal) haka 65 Kg Youth Girls bad kala ïoh 1 takma Ksiar (Gold Medal) haka 65 Kg Senior Women. Ha ka juh ka por ka Olivia Dkhar ka jop ruh ïa ka nam lahduh (Champion of Champions) ha ka Youth Girls category. Napdeng kine 7 ngut ki saw ngut na ki dei kiba don haka jingduna ha ki dkhot met.
